काठमाडौँ उपत्यकाको घना बस्तीलाई व्यवस्थित गर्ने उद्देश्यले उपत्यका वरिपरी नयाँ शहरको विकास गर्ने भन्दै शहरी विकास राज्यमन्त्री रामवीर मानन्धरले बहस चलाइएको बताएका छन् ।

राज्यमन्त्री मानन्धरले आफ्नो कार्यकालको १ सय दिन पुगेको सन्दर्भमा मन्त्रालयमा आयोजित पत्रकार सम्मेलनमा नयाँ शहर विकासका लागि आफूले बहस चलाएको बताएका हुन् ।

नयाँ वैकल्पिक शहर निर्माणका लागि प्रस्तावित टोखा–छहरे सुरुङ मार्गसँगै नुवाकोटको थानसिंह, ढिकुरे, गँगटेहुँदै देविघाटदेखि रातमाटे हुँदै गल्छीसम्म एउटा शहर बन्न सक्ने राज्यमन्त्री मानन्धरको बुझाइ छ । ‘थानकोट–नौबिसेदेखि गल्छिसम्मको भु–भागमा सुविधासम्पन्न नयाँ शहर निर्माणका लागि वृहत्तर छलफल अगाडि बढाएका छौं,’ राज्यमन्त्री मानन्धरले भने ।

नुवाकोटको छहरेदेखि धादिङको गल्छिसम्मको करीब ३५ किलोमिटर र धादिङको गल्छिदेखि नुवाकोटको चाउथे–बन्चरे हुँदै काठमाडौंको तिनपिप्ले–बालाजु जोड्ने करीब ३० किलोमिटरसहित जम्मा ६५ किलोमिटर उपत्यकालाई घेर्ने वैकल्पिक राजमार्ग निर्माण गर्न आवश्यक रहेको राज्यमन्त्री मानन्धरले बताए ।

काम अगाडि बढाउन संघीय/प्रदेश र स्थानीय जनप्रतिनिधिसँग समन्वय गर्दै अगाडि बढेको राज्यमन्त्री मानन्धरको दाबी छ ।

‘मकवानपुरको इन्द्रसरोवर, सिन्धुपाल्चोकको मेलम्ची, इन्द्रावती उपत्यका, दोलालघाट, पाँचखाल, भकुण्डेबेसी, बनेपा, धुलिखेल र पनौति क्षेत्र समाहित गरेर वृहत्तर शहर विकासको सम्भावना रहेको छ,’ राज्यमन्त्री मानन्धरले भने ।

सम्भावित क्षेत्रमा नयाँ शहर विकास गर्न सकिएमा प्रदुषण मुक्त राजधानी बनाउन सकिने राज्यमन्त्री मानन्धरको धारणा रहेको छ ।

धादिङको सल्यानटारमा बुढीगण्डकी जलविद्युत आयोजना निर्माण सकिएपछि १७ किलोमिटरको क्षेत्रमा नयाँ शुन्दर शहर निर्माण हुनसक्ने धारणा व्यक्त गर्दै राज्यमन्त्री मानन्धरले यसको कार्यान्वयनको लागि आवश्यक पहल र छलफल भइरहेको पत्रकार सम्मेलनका क्रममा बताए ।

बाराको जितपुर सिमरा उपमहानगरपालिकामा चक्रपथ, गोरखाको मनकामना जाने सडकको स्तरउन्नती र तनहुँको ब्यास–देवघाट–कालिगण्डकी करिडोर हुँदै दामोदर कुण्डसम्मको ८ सय किलोमिटर लामो पर्यटकीय पदमार्ग निर्माणको काम अगाडि बढाइएको उनको दाबी छ ।

‘काठमाडौं उपत्यकाभित्र अव्यवस्थित पार्किङको समस्यालाई सम्बोधन गर्न व्यवस्थित पार्किङस्थल निर्माण प्रक्रिया अगाडि बढाएका छौं,’ मन्त्री मानन्धरले थपे ।

काठमाडौं उपत्यकाभित्र चक्रपथ बिस्तार, उपत्यकाभित्रका भित्री सडकहरूको सुधार र सडकका खाल्डाखुल्डी पुर्ने कामलाई मन्त्रालयले तीव्रता दिएको छ ।

सरकारबाट घोषणा गरिएका २७ वटा शहरहरुको निर्माणको लागि मन्त्रालयको तर्फबाट आवश्यक थालनी भएको राज्यमन्त्री मानन्धरले जनाएका छन् ।

जसमा तेह्रथुमको वसन्तपुर, पाँचथरको फिदिम, सिन्धुलीको खुर्कोट, धादिङको बैरेनी–गल्छी, बाग्लुङको बुर्तीबाङ, तनहुँको डुम्रे, रुकुमको चौरजहारी, दैलेखको राकम कर्णाली, अछामको साँफेबगर र बैतडीको पाटन शहर रहेका छन् ।