कोविड–१९ भनिने कोरोनाभाइरसको प्रकोप चीनपछि इरानमा बढी देखिएको छ । 

बीबीसीले इरानका अस्पतालहरूको स्रोत उद्धृत गर्दै इरानमा भाइरसका कारण २१० भन्दा बढी मानिसको मृत्यु भएको लेखेको छ । तर इरान सरकारले भाइरससम्बन्धी तथ्यांक लुकाएको र त्यसलाई रोक्नका लागि पर्याप्त कदम नउठाएको आरोप छ । 

यसैबीत इरानका धार्मिक स्थलमा मानिसहरूले ढोका चाटेको तस्वीर र भिडियो सार्वजनिक भएका छन् । यसले कोरोना फैलिने कारण पनि देखाएको छ । भिडियोमा मानिसहरू ढोका चाट्दा आफूलाई संक्रमण नहुने भनी खुलमखुला भनिरहेका सुनिन्छन् । 

इरानमा विद्यालय, विश्वविद्यालय र खेलकुद केन्द्रहरू बन्द गरिएका छन् र मानिसहरूलाई सार्वजनिक स्थानमा नजान अपील गरिएको छ । धार्मिक शहर कोममा बढी तबाही मच्चिएको छ तर त्यहाँ धार्मिक स्थलहरू बन्द गरिएका छैनन् । 

कोरोनाको भाइरस मानव शरीरबाट बाहिर हुँदा पनि नौ दिनसम्म बाँच्न सक्ने एक अध्ययनले देखाएको छ । तर इरानबाट आएको भिडियोमा एकजना व्यक्तिले भनेको सुनिन्छ, ‘मानिसहरूलाई कोरोनाभाइरसबाट नतर्साऊ ।’

भिडियो शेयर गर्ने पत्रकार मसीह अलीनेजेदले धार्मिक स्थललाई खुला राखेर सरकारले इरान र संसारभरिका मानिसको ज्यानलाई जोखिममा पारेको बताएका छन् ।