२३ जेठ २०८३, शनिबार
सवारीचालक अनुमतिपत्र अर्थात् लाइसेन्स पाउनका लागि ड्राइभिङ टेस्ट दिनुपर्ने हुन्छ र त्यसमा उत्तीर्ण हुनुुहुन्छ ।
यसरी टेस्ट पास गरेको १० मिनेटमा एक व्यक्तिले कारलाई नहरमा लगेर हालेका छन् ।
घटना चीनको गुइचो प्रान्तमा रहेको लाओपिङ पुलमा भएको हो । ड्राइभिङ टेस्ट पास गरेर पुलमाथि कार गुडाइरहेका व्यक्तिको ध्यान भड्कियो र उनले गाडीलाई नहरमा पसाए ।
खासमा झाङ नामक ती चालकले गाडी चलाउँदै गर्दा मोबाइलमा ड्राइभिङ टेस्ट पास गरेकोमा आएको बधाई सन्देश पढिरहेका थिए । त्यसक्रममा उनको ध्यान भड्कियो र उनले गाडीलाई नहरमा झारे ।
भिडियोमा झाङले पुलमा गाडी ल्याउँदा केही मानिस पुल तरिरहेको देखिन्छ । ध्यान भड्किएपछि उनी गाडीलाई देब्रेतिर मोड्छन् र नहरमा पसाउँछन् । तर झाङ आफैं कारबाट निस्कन सफल भएका थिए ।
कार केही बेर पानीमा तैरियो । झाङले कारको ढोका खोल्न नसकेपछि अर्कोतिरको ढोकामा लात हानेर खोले अनि बाहिर निस्किए । त्यसो नगरेको भए उनी कारबाट बाहिर निस्कन सक्दैनथिए । पछि स्थानीयहरूले उनलाई निस्कन सहायता गरे । उनीहरूले उनलाई सुक्खा कपडा पनि दिए ।
प्रहरीले कारलाई नहरबाट निकालेको छ । प्रहरी अधिकारीहरूले व्यक्तिमाथि कुनै जरिवाना लगाइएको छ कि छैन भनी जानकारी दिएका छैनन् ।
