०४ असार २०८३, बिहीबार
दोस्रोपटक मिर्गौला प्रत्यारोपण गरेका प्रधानमन्त्री केपी ओली १२ दिनको अस्पताल बसाइपछि शुक्रबार साँझ सरकारीनिवास बालुवाटार फर्किएका छन् । १९ फागुनमा महाराजगन्जस्थित शिक्षण अस्पतालमा भर्ना भएका उनको २१ फागुनमा मिर्गौला प्रत्यारोपण गरिएको थियो ।
डिस्चार्ज भए पनि संक्रमणको जोखिम अझै रहेको भन्दै चिकित्सकले प्रधानमन्त्री ओलीलाई सचेत गराएका छन् । ‘अहिले उहाँ (प्रधानमन्त्री)का सबै सूचकहरू राम्रो अवस्थामा छन्,’ उनले भनिन्, ‘डिस्चार्ज भए पनि समय–समयमा स्वास्थ्य परीक्षण गर्नुपर्छ । प्रधानमन्त्री नियमित चिकित्सकको निगरानीमै रहनुहुन्छ,’ प्रधानमन्त्रीकी निजी चिकित्सक प्रा.डा. दिव्या सिंह शाहले भनिन् ।
आवश्यक सतर्कता अपनाएर नियमित काम गर्न सक्ने भए पनि सामान्य जीवनमा फर्किन भने प्रधानमन्त्री ओलीलाई ६ महिनादेखि एक वर्षसम्म लाग्ने डा. सिंहले बताइन् । ‘आवश्यक सतर्कता अपनाएर नियमित काम गर्न सक्ने अवस्थामा भने हुनुहुन्छ,’ उनले भनिन् ।
सामान्यतः मिर्गौला प्रत्यारोपण गरेको व्यक्ति पाँच दिनमा डिस्चार्ज हुन्छन् । तर, प्रधानमन्त्री ओलीमा संक्रमणको उच्च जोखिम भएको र बालुवाटारमा आइसोलेसन रुमको तयारी नभएकाले थप केही दिन अस्पतालमा राखिएको थियो । मिर्गौला दाता समीक्षा संग्रौला ज्ञवालीलाई भने बुधबार नै डिस्चार्ज गरिएको थियो ।
प्रधानमन्त्री ओलीको १२ वर्षअघि ०६४ मा पहिलोपटक भारतको दिल्लीस्थित अपोलो अस्पतालमा मिर्गौला प्रत्यारोपण गरिएको थियो । त्यतिवेला उनलाई चितवननिवासी भाइबुहारी अञ्जना घिमिरेले मिर्गाैला दान दिएकी थिइन् । त्यही मिर्गौलामा समस्या आएपछि दोस्रो पटक प्रत्यारोपण गरिएको हो । नयाँ पत्रिकामा खबर छ ।
