भारतीय प्रधानमन्त्री नरेन्द्र मोदीले विश्वव्यापी महामारीको रूपमा फैलिएको कोरोना संक्रमणसँग जुध्न दक्षिण एसियाली क्षेत्रीय सहयोग संगठन (सार्क)मा आबद्ध राष्ट्रका कार्यकारी प्रमुखबीच भिडियो कन्फरेन्स गर्ने आह्वान गरेपछि भारत त्यसको तयारीमा लागेको छ ।

आइतवार साँझ नेपाली समयअनुसार ५ बजेर १५ मिनेट जाँदा गर्ने भनिएको भिडियो कन्फरेन्सको प्रचार गर्दै नेपालस्थित भारतीय दूतावासले आधिकारिक ट्वीटर ह्याण्डलमा त्यसबारे जानकारी दिन तस्वीर पोस्ट गरेको छ ।

विगतमा सार्कको विकल्पमा बिमस्टेकलाई अघि बढाउन खोजेको मोदी सरकारले सार्क राष्ट्रहरूबीच भिडियो कन्फरेन्स गर्ने प्रस्ताव गरेको हो । मोदीको उक्त प्रस्ताव आएपछि सार्कका सबै राष्ट्रहरूले त्यसमा आफू सकारात्मक भएको प्रतिक्रिया दिएका छन् ।

२०१६ को नोभेम्बरमा हुनुपर्ने सार्कको १९ औं शिखर सम्मेलन भारत-पाकिस्तानबीच देखिएको सैन्य तनावका कारण रोकिएको थियो । त्यतिबेला पाकिस्तानमा हुने तय गरिएको सम्मेलनमा भारतले आफू सहभागी हुन नसक्ने बताएपछि रोकिएको थियो ।

त्यतिबेला रोकिएको शिखर सम्मेलन अहिलेसम्म हुन सकेको छैन । पछिल्लो समयमा भारतले सार्कका बारेमा चासो देखाउनुलाई अर्थपूर्ण मानिएको छ ।