०२ असार २०८३, मंगलबार
अमेरिकी बहुराष्ट्रिय कम्पनी एप्पल कम्पनीले चीनबाहेक अन्य मुलुकमा रहेका आफ्ना स्टोर (बिक्री केन्द्र) आगामी मार्च २७ सम्म बन्द गरेको छ।
एप्पलका प्रमुख कार्यकारी टिम कूकले ट्वीट गर्दै चीन बाहेक एप्पलका स्टोर मार्च २७ सम्म बन्द गरिएको र कोरोनाको संक्रमण रोकथाममा सघाउन १ करोड ५० लाख अमेरिकी डलर सहयोग गर्ने घोषणा गरिएको बताएका हुन्।
कम्पनीले चीन बाहेकका अन्य मुलुकमा रहेका आफ्ना कार्यालयका कर्मचारीलाई खुकुलो कार्यस्थलको व्यवस्था गरिएको जनाएको छ। कूकले अनलाइन स्टोर भने खुलै रहने बताए।
कम्पनीले घरबाटै काम गर्न सक्ने भएमा त्यसै बमोजिमको व्यवस्था गर्ने तथा कार्यालयमै आएर काम गर्नु पर्ने कर्मचारीका लागि निर्देशिका बमोजिम आवश्यक सजकता अपनाइने बताएको छ।
सिन्ह्वाका अनुसार चीनमा कोरोना संक्रमणमा नाटकीय रुपमा सुधार आएका कारण एप्पलका सबै स्टोर खुला गरिएको छ।
अमेरिकामा रहेका ठूला बहुराष्ट्रिय कम्पनीले पनि आफ्ना कार्यालयको व्यवस्थापनमा नयाँ व्यवस्था गरेका छन्।
