०९ असार २०८३, मंगलबार
सरकारले १ हप्ताका लागि भारत र चीनसँगका नाका बन्द गर्ने निर्णय गरेसँगै नेपालको दोस्रो ठूलो नाका रुपन्देहीको बेलहिया (सुनौली) पनि सोमवार बिहान १० बजेदेखि बन्द भएको छ ।
जिल्ला प्रहरी कार्यालय रुपन्देहीका प्रवक्ता तथा डीएसपी खड्गबहादुर खत्रीले अबको १ हप्तासम्म नाका कडाइका साथ बन्द हुने लोकान्तरलाई जानकारी दिए ।
आइतवारको मन्त्रिपरिषद् बैठकले सीमानाका बन्द गर्ने निर्णय गरेको थियो । विश्वव्यापी महामारीको रुप लिएको कोरोना भाइरसको संक्रमण नेपाल भित्रिन नदिन सरकारले सीमानाका बन्द गरेको हो ।
सोमवार बिहान मात्रै सुनौलीबाट ६१५ जना नेपाल भित्रिएका छन् ।
उनले भने, ‘नाकामा आएका ५०–६० जना रोकिएका छन् । तिनीहरूलाई आउन रोकिएको छ । नाकामा भएकालाई पनि आउन दिइँदैन ।’ नाकामा रोकिएकाहरूले नेपाल प्रवेश गर्न दिन प्रहरीसँग आग्रह गरेका छन् ।
‘उनीहरूलाई नेपाल प्रवेश गर्न दिइँदैन । उतै व्यवस्था गर्छन्, उतै बस्छन्,’ खत्रीले भने ।
सुनौली नाकाबाट आइतवार ४ हजार र शनिवार १७ हजार नेपाली भित्रिएको खत्रीले जानकारी दिए । नेपालबाट भारततर्फ नाकामा विशेष चेकजाँच गरेर जान दिइएको छ । आइतवार भारतमा जनता कर्फ्यु लागेर सुनौली बजार बन्द थियो । पश्चिम नवलपरासीले शनिवारदेखि नै भारतसँग जोडिएका सबै नाका बन्द गरेको थियो ।
अध्यागमन कार्यालय बेलहियाका प्रमुख गिरीराज खनालले केही मानिसहरू नाकामा रोकिएको जानकारी दिए । ‘मानिसहरू रोकिएका छन् । प्रवेश दिने कि नदिने प्रहरीले छिट्टै निर्णय गर्ला ।’
तेस्रो देशका पर्यटकलाई मार्च १४ गतेदेखि आवातजावत रोकिएको खनालले जानकारी दिए । नाका र लामो दूुरीका सार्वजनिक सवारी बन्द गरेसँगै प्रदेशका बजार सुनसान भएका छन् । मानिसहरू घर बाहिर निस्केका छैनन् ।
