२३ असार २०८३, मंगलबार
अमेरिकाका राष्ट्रपति डोनल्ड ट्रम्पले चीनसँग मिलेर कोरोनाभाइरससँग लड्ने बताएका छन् ।
शुक्रवार एक ट्वीटमार्फत उनले चीनका राष्ट्रपति सी चिनफिङसँग कुराकानी भएको जानकारी दिए ।
उनले लेखे, ‘भर्खरै चीनका राष्ट्रपति सीसँग राम्रो कुराकानी भयो । हाम्रो यस ग्रहका धेरै ठाउँमा कहर मच्चाइरहेको कोरोनाभाइरसका बारेमा हामीले विस्तारमा चर्चा गर्यौं । चीनले निकै दुःख सहेको छ र भाइरसका विषयमा राम्रो जानकारी हासिल गरिसकेको छ । हामीहरू निकट सहकार्य गरिरहेका छौं । भव्य सम्मान !’
Just finished a very good conversation with President Xi of China. Discussed in great detail the CoronaVirus that is ravaging large parts of our Planet. China has been through much & has developed a strong understanding of the Virus. We are working closely together. Much respect!
— Donald J. Trump (@realDonaldTrump) March 27, 2020
यसअघि कोरोनाभाइरस फैलनुमा चीन दोषी रहेको भनी ट्रम्पले विवादास्पद बयान दिने गरेका थिए । उनले कोरोनाभाइरसलाई चिनियाँ भाइरस नामकरण गर्दै चीनलाई चिढ्याएका थिए ।
तर अहिले अमेरिकामा भाइरस व्यापक रूपमा फैलिँदै जाँदा ट्रम्पको नेतृत्व तथा व्यवस्थापनमा प्रश्न उठ्न थालेको छ । त्यसैले उनले चिनियाँ सहयोग लिनुपर्ने अवस्था आएको छ ।
चीनले अहिले विश्वका विभिन्न मुलुकमा स्वास्थ्य उपकरण र स्वास्थ्यकर्मीहरू पठाएर भाइरसविरुद्धको लडाइँमा नेतृत्व लिइरहेको छ ।
