विश्वव्यापी रूपमा फैलिएको कोरोना भाइरसको संक्रमण फैलिन नदिन सरकारले गरेको ३ साता बढी लामो बन्दाबन्दीमा दैलेख जिल्ला सदरमुकामबाहेक स्थानीय तहका अधिकांश पसल खुलेका छन् । 

सरकारले बन्दाबन्दीको पूर्ण पालना गर्न सूचना जारी गरे पनि सूचनाको बेवास्ता गर्दै गाउँका पसलहरू चलिरहेको छ ।

जिल्लाका ११ स्थानीय तहका मुकामबाहेक गाउँका फुटकर पसलमा मानिसहरूको भीड लाग्ने गरेको छ । गाउँका फुटकर पसलेले निर्धक्क व्यापार व्यवसाय गरिरहेका छन् ।

दैलेख जिल्लाको सदरमुकाम समेत रहेको नारायण नगरपालिकाले गाउँका पसल खुला भएपछि सबै फुटकर पसल तथा होटललाई बन्द गर्न आग्रह गर्दै पत्र थमाएको छ । वडा नम्बर १ मा रहेको सदरमुकाम बाहेकका अन्य १० वडाका वडाध्यक्षलाई परिचालन गरी पसलमै पुगी पत्र बुझाइएको नगर प्रमुख रत्नबहादुर खड्काले जानकारी दिए ।

उनले भने, ‘हामीले नगरका १० वटै वडाध्यक्षलाई गाउँका फुटकर पसलसमेत बन्द गर्न पत्र काटेर खटाएका छौं । अन्तिम पटक पत्रद्वारा आग्रह गरिएको हो । अटेरी गरी खुला गरे पसल नै सिल गरिने छ ।’

निर्वाचन क्षेत्र–२ को दुल्लु नगरपालिकामा समस्या देखिएकाले बन्दाबन्दीलाई कडा पारिने नगर प्रमुख घनश्याम भण्डारीले बताए । गाउँका पसलहरू खुला हुँदा बन्द गर्ने अभियान अगाडि बढाइने आठबिस नगर प्रमुख खड्गराज उपाध्यायले बताए ।

साना तथा फुटकर पसल खुला हुँदा कोरोना भाइरस फैलिने सम्भावना देखिएपछि सावधानी अपनाउन आफ्नो गाउँपालिकामा सहुलियत पसल सञ्चालन गरिएको गुराँस गाउँपालिकाका अध्यक्ष खेमराज वलीले जानकारी दिए ।

‘हामीले स्थानीय जनताका लागि सहुलियत पसल हरेक वडामा सञ्चालन गरेका छौं, त्यहाँ कोरोना भाइरसको संक्रमण रोक्न सबै नियम पालना गरिएको छ । सहुलियत पसलबाहेक अन्य पसलहरू खुला भएको जानकारी पाए कारबाही गरिने छ,’ उनले भने । 

महामारीमा सरकारले कोरोना रोकथामका लागि गरेको बन्दाबन्दीलाई पूर्ण पालना गर्न सबै व्यापारीलाई पसल बन्द गरी सहयोग गरिदिन आग्रह गरिएको दैलेख उद्योग वाणिज्य संघका अध्यक्ष कुलबहादुर विकले बताए । उनले भने, ‘कतै भूलवश गाउँमा पसलहरू खुल्ला भएका होलान् ती पसललाई हामी हाम्रो माध्यमबाट बन्द गर्न लगाउँछौं ।’

भारतबाट आएका मानिसहरू क्वारेन्टाइनमा बस्नुको साटो स्थानीय पसलहरुमा मदिरा सेवन गरेका र तास खेलेका भेटिने गरेको महाबु–१ का शिक्षक जंगबहादुर थापाले बताए । सम्झाउँदा उल्टो आफूलाई गाली गर्ने गरेको उनको भनाइ छ । ‘स्थानीय तहका मुकामबाहेक अन्य गाउँमा सायद यस्तै हालत छ, सरकारका लागि बन्दाबन्दी मान्नु पर्ने जस्तो बुझाइ हरेकमा छ, त्यसैले सूक्ष्म अनुगमन गर्न जरुरी छ,’ उनले भने ।

अधिकांश गाउँका पसलमा बस्ने, गोप्यरूपमा तास खेल्ने र त्यो पनि नभए हुल बाँधेर खोलामा आउने गरेको भैरवी–१ कर्णबहादुर कार्कीले बताए । ‘मैले खोलामा माछा मार्न थालेको २० वर्ष भयो । मेरो घर भैरवी र महाबुको सङ्गममा छ तर खोलामा मानिसको यति ठूलो भीड अहिलेसम्म देखेको थिएन, भीड देख्दा मलाई अचम्म लागेको छ,’ उनले भने । – पुरुषोत्तम थापा/रासस