इटलीमा कोरोनाभाइरस लागेको एक वृद्ध जोडीले सघन उपचारक कक्षमै आफ्नो विवाहको ५०औं वर्षगाँठ मनाएको छ । उनीहरूलाई वर्षगाँठ मनाउने व्यवस्था स्वास्थ्यकर्मीहरूले गरिदिएका हुन् । 

७१ वर्षीया सान्द्रा र उनका ७३ वर्षीय पति जियानकार्लोले अनुहारमा भेन्टिलेर भए पनि खाटबाट एकअर्काको हात समातेका थिए । फर्मो शहरको मुर्री अस्पतालमा यो घटना भएको हो । 

त्यस अस्पतालकी नर्स रोबर्ता फेर्रेतीले वृद्ध जोडीको ५०औं वर्षगाँठ आउन लागेको थाहा पाएपछि अन्य स्वास्थ्यकर्मीसँग मिलेर पार्टी आयोजना गरिन् । 

फेर्रेतीले स्थानीय सञ्चारमाध्यमलाई बताइन्, ‘सान्द्रा आफ्नो लागि नभई आफ्ना पतिका लागि बेस्सरी रोइन् । यत्तिका वर्ष हुँदा पनि आफूले सान्द्रलाई माया गरिरहेको पतिले बताए । मैले उनीहरूको वैवाहिक वर्षगाँठ आउन लागेको थाहा पाएपछि त्यसलाई मनाउन उनीहरूलाई सहयोग गर्ने सोच बनाएँ ।’

पार्टी १० मिनेट मात्र चल्यो । अस्पतालका कर्मचारीहरूले सुरक्षा कवच लगाएर वृद्ध जोडीलाई घेरेको र हातले प्रेमको चिह्न बनाएको देखिन्छ । 

फेर्रेतीले बताइन्, ‘हामीले सानो केकमा ५० अंकको आकृति भएको मैनबत्ती राख्यौं किनकि अक्सिजन नजिक त्यसलाई बाल्न हुँदैन । हामीले विवाह धुन बजायौं र उनीहरूले आफ्नो भएको शक्ति उपयोग गरेर आआफ्नो खाटबाट एकअर्काको हात समाते ।’