१२ साउन २०८३, मंगलबार
इरानले अन्तरिक्षमा बुधवार स्याटेलाइट (भूउपग्रह) प्रक्षेपण गरेपछि अमेरिकासँगको तनाव झनै बढ्ने देखिएको छ ।
आफ्नो वेबसाइटमा इरानको रिभोल्युसनरी गार्डले यो प्रक्षेपण देशको मध्यभागमा रहेको मरुभूमिबाट गरिएको र भूउपग्रह पृथ्वीको सतहभन्दा ४२५ किलोमिटर माथि पुगेको जनाएको छ ।
भूउपग्रहको नाम नूर राखिएको छ । यसलाई अन्तरिक्षमा पुर्याउन गसद भूउपग्रह वाहक उपयोग गरिएको हो ।
अमेरिकाको परराष्ट्र मन्त्रालय र पेन्टागनले यसमा प्रतिक्रिया जनाउन बाँकी छ ।
इरानसँगको आणविक सम्झौताबाट वाशिङटन बाहिरिएपछि र अमेरिकी ड्रोनले जनरल कासिम सुलेमानीको हत्या गरेपछि दुई देशको तनाव उच्च स्थितिमा रहेको बेलामा यो प्रक्षेपण गरिएको हो ।
इरानले भूउपग्रह पठाउने प्रयासहरू लगातार विफल भइरहेको बेलामा अहिलेको सफलता महत्त्वपूर्ण भएको लेबेक इन्टरनेसनल संस्थामा जासूसी प्रमुख माइकल होरोविट्जले बताए ।
‘वाशिङटनले यो विकासक्रमलाई नजिकैबाट नियाल्ने सम्भावना छ । इरानको अन्तरिक्ष कार्यक्रम उसको क्षेप्यास्त्र र आणविक कार्यक्रमसँग जोडिएको छ । इरानले भारी सैन्य भूउपग्रह अन्तरिक्षमा पठाउन सक्दा अन्तर्महादेशीय क्षेप्यास्त्रमा आणविक वारहेड पनि पठाउन सक्ने यसबाट देखिएको छ,’ उनले थपे ।
