उदयपुरमा कोरोना संक्रमति बढ्दै गएपछि लहानमा त्रास, आवतजावत रोक्न माग

उदयपुरको भुल्केमा थप ११ जनामा कोरोना भाइरस संक्रमण पुष्टि भएपछि उदयपुर जिल्लाबाट हुने आवतजावत तत्काल रोक्न लहानका स्थानीयले माग गरेका छन् । 

उनीहरूले छिमेकी जिल्ला उदयपुरमा कोरोना संक्रमित भेटिएकाले सिरहाको लहान उच्च जोखिमा परेको भन्दै उदयपुर जिल्लाबाट हुने गरेको आवतवाजत पूर्णरुपमा रोक्नुपर्ने माग गरेका हुन् ।

उदयपुरको विभिन्न स्थानबाट सर्वसाधारण लहान आउने र लहानबाट उदयपुरतर्फ आवतजावत भइरहेकाले लहान पनि उच्च जोखिममा रहेको भन्दै नागरिक समाजका अगुवाहरुले उदयपुरबाट हुने आवतजावत तत्काल रोक्न स्थानीय प्रशासनसँग माग गरेका छन् ।

आवतजावत रोक नलगाए स्थिति भयावह हुन सक्ने भएकाले लहानको पूर्वी प्रवेश नाकाबाट सर्वसाधारणको प्रवेशमा पूर्ण रुपमा रोक लगाउनुपर्ने नागरिक अगुवा रामानान्द गुप्ताको भनाइ छ । 

उदयपुरको त्रियुगा नगरपालिकास्थित भुल्केमा कोरोना संक्रमितको संख्या २४ जना पुगेपछि सिरहाको लहानमा त्रास बढ्ेको हो । कोरोना भाइरस रोकथामका लागि सरकारले लकडाउन गरेको विगत १ महिनादेखि दैनिक जीवन प्रभावित हुँदै आएको छ । यता सुरक्षाकर्मीले लकडाउन पालना गराउन सडकमा चेकजाँजलाई कडाई गरेका छन् । 

यसैबीच लकडाउनको मारमा परेका गरीब, विपन्न, असहाय र मजदरलाई सिरहाको सखुवानन्कारकट्टी गाउँपालिकाले बुधवारदेखि राहत वितरण शुरू गरेको छ । सखुवानन्कारकट्टी गाउँपालिका–१ मौवाहीबाट राहत वितरण गर्न शुरू गरेको हो ।

प्रतिपरिवार १५ किलो चामल, २ किलो दाल, १ किलो नुन, २ किलो चिनी, १ लिटर तेल, २५० ग्राम मिक्स मसला, ह्यान्डवास र साबुन १/१ थानका दरले वितरण गर्न शुरु गरेको गाउँपालिकाका अध्यक्ष केदारनाथ यादवले जानकारी दिए ।