१२ साउन २०८३, मंगलबार
अमेरिकाको मिसूरी राज्यले आफूविरुद्ध दायर गरेको मुद्दा अत्यन्तै मूर्खतापूर्ण भनी चीनले बुधवार प्रतिक्रिया दिएको छ ।
चीनको परराष्ट्र मन्त्रालयका प्रवक्ता गेङ शुआङले यो मुद्दाको कुनै तथ्यपरक तथा कानूनी आधार नरहेको बताए । चीनले गरेको उत्कृष्ट व्यवस्थापनका कारण कोरोनाभाइरस अहिले देशमा निकै कम भएको पनि उनले दोहोर्याए ।
मन्त्रालय र चीनका अन्य सरकारी निकायले वुहानमा भएको संक्रमण खबर लुकाइएको भन्ने आरोपलाई जोडतोडका साथ खण्डन गर्ने गरेका छन् । राजनीतिक स्थिरताका लागि सार्वजनिक स्वास्थ्यलाई दाउमा राखिएको आरोप चीनमाथि लाग्दै आएको छ । संक्रमणको खबर दिने स्वास्थ्यकर्मीहरूलाई कानूनको डर देखाएर मौन बस्न लगाइएको र वार्षिक प्रान्तीय सम्मेलन चलिरहँदा वुहानमा संक्रमणका केसहरू लुकाइएको आरोप पनि छ ।
‘यो कथित मुद्दा बकवास हो र यसको कुनै तथ्यपरक र कानूनी आधार छैन,’ गेङले दैनिक ब्रीफिङको क्रममा भने । संक्रमण शुरू भएदेखि चीनले खुला, पारदर्शी र जिम्मेवार तरिकाले काम गरिरहेको र अमेरिकी सरकारले यस्तो निहुँखोजुवा मुद्दालाई खारेज गर्नुपर्ने उनले बताए ।
मिसूरीका महान्यायाधिवक्ता एरिक स्मिटले मंगलवार मुद्दा दायर गर्दै महाव्याधिका लागि चिनियाँ अधिकारीहरू जिम्मेवार रहेकोले उनीहरूमाथि कारवाही गर्नुपर्ने माग राखेका थिए ।
