रूपन्देहीको हदेही कोटहीमाई गाउँपालिकाका कोरोना संक्रमित युवाको परिवारका १० जना सदस्यमा कोरोना संक्रमण नभएको पाइएको छ ।

कोटहीमाई–१ सिपवा पुर्निहवा गाउँका कोरोना संक्रमित युवकको परिवारका दश जनाको पीसीआर परीक्षण रिपोर्ट नेगेटिभ आएको हो ।

रूपन्देहीको भैरहवास्थित प्रदेश जनस्वास्थ्य प्रयोगशालामा गरिएको परीक्षणमा परिवारका सबैकै रिपोर्ट नेगेटिभ आएको प्रदेश जनस्वास्थ्य प्रयोगशालाका प्रमुख डा. राजेन्द्र गिरीले जानकारी दिए ।

भारतको दिल्लीबाट ट्रक चढेर र पैदल यात्रा गर्दै ‘लकडाउन’को समयमा वैशाख ५ गते मर्चवारको ठोठरी नाकाबाट घर आएका २५ वर्षका युवकमा शुक्रबार कोरोना संक्रमण पुष्टि भएको थियो ।

त्यसपछि परिवारका सदस्यहरुको पनि कोरोना परीक्षण गरिएको हो । कोरोना संक्रमित युवकलाई शुक्रबार नै बुटवल धागो कारखानास्थित कोरोना विशेष अस्थायी अस्पतालमा भर्ना गरेर उपचार भइरहेको छ । उनको स्वास्थ्य अवस्था सामान्य छ ।