अमेरिकाका राष्ट्रपति डोनल्ड ट्रम्पले सन् २०२० को अन्त्यसम्ममा देशले कोरोनाभाइरसको खोप पाइसक्ने बताएका छन् । 

‘हामी वर्षको अन्त्यसम्ममा खोप पाउने कुरामा विश्वस्त छौं,’ ट्रम्पले फक्स न्युजको टाउन हल शो कार्यक्रममा बताए । 

विद्यालय तथा विश्वविद्यालयहरू सेप्टेम्बर महिनासम्ममा खोल्नका लागि आग्रह गर्ने उनले बताए । 

अमेरिका तथा अन्य मुलुकले कोरोनाको खोप ल्याउनका लागि काम गरिरहेको बेलामा ट्रम्पको बयान आएको हो । 

अन्य मुलुकले खोप बनाउनमा अमेरिकालाई उछिने पनि आफू खुशी नै हुने र सम्मानका लागि टोपी झिक्ने उनले बताए । 

‘मलाई मतलब छैन । काम गर्ने खोप मात्र चाहन्छु म ।’

खोपसम्बन्धी अनुसन्धानमा मानवमाथि गरिएको परीक्षणमा हतार गर्दा हुने खतराका बारेमा सोध्दा ट्रम्पले भने, ‘उनीहरू स्वयंसेवी हुन् । के गरिरहेको छु भनी उनीहरूलाई थाहा छ ।’

खोप कहिले आइसक्छ भन्ने कुराको भविष्यवाणी नगर्न सल्लाहकारहरूले भनेको भए पनि ट्रम्पले आफूलाई लागेको कुरा बोलेको बताए ।