०८ साउन २०८३, शुक्रबार
प्रतिनिधि सभा अन्तर्गतको अन्तर्राष्ट्रिय सम्बन्ध समितिमा परराष्ट्रमन्त्री प्रदीप ज्ञवालीलाई सांसदहरूले र्याख-र्याख पारेका छन् ।
आइतवार बसेको समितिको बैठकमा सत्तारूढ दल नेपाल कम्युनिस्ट पार्टी (नेकपा)कै सांसद भीम रावल, समाजवादी पार्टीकी सांसद रेनुका गुरुङ र प्रमुख प्रतिपक्षी दल नेपाली कांग्रेसका सांसद दिव्यमणि राजभण्डारीले मन्त्रीले समय नदिएको आरोप लगाएका थिए ।
समितिमा उपस्थित मन्त्री ज्ञवालीले शुरुमै लिपुलेकमा भारतले बनाएको बाटोका बारेमा सरकारी धारणा राखे । उनले ११ बजे प्रतिनिधि सभा बोलाइएकाले आफूसँग थप समय नभएको स्पष्टिकरण दिए ।
ज्ञवाली बोलेपछि समितिकी सभापति पवित्रा खरेल निरौलाले सांसदहरूलाई बोल्न समय दिएकी थिइन् ।
निरौलाले सांसदहरूलाई छोटो समयमा आफ्ना कुराहरू राख्न निर्देशन दिएपछि भीम रावलले यस्ता विषयहरू छोटो बहसले पार नलाग्ने भन्दै कड्किएका थिए ।
रावलले ‘राष्ट्रिय मामिलाभन्दा ठूलो केही हुन सक्दैन,’ भनेर छोटो समयप्रति असन्तुष्टि जनाएका बेला अन्य सांसदहरूले पनि मन्त्रीलाई र्याख-र्याख पारेका थिए ।
सांसदहरूले आफूहरू बोल्न पाउनुपर्ने माग राखेपछि केहीबेर समितिमा दोहोरी चलेको थियो । मन्त्री ज्ञवालीले भने विभिन्न समितिमा गएर आफूले जवाफ दिनुपरेको भन्दै बढी समय दिन नसक्ने जनाएका थिए ।
मन्त्री ज्ञवालीले प्रश्न गरे, 'मन्त्रीको के काम छ भन्ने ? म कुनै व्यक्तिगत काममा लाग्ने हो र ?’ सांसदहरूले प्रश्न गर्दागर्दै सभापति खरेलले भने मन्त्रीलाई बोल्न निर्देशन दिइसकेकी थिइन् ।
