भारतका भूराजनीतिक विश्लेषक कमर आगाले आइतवार सिक्किमको सीमामा भारत र चीनका सैनिकहरूबीच भएको हात हालाहालमा गिल्गिट बाल्टिस्तानको भूमिका हेर्नुपर्ने बताएका छन् । 

उनका अनुसार, बृहत्तर कश्मीर क्षेत्रमा पर्ने गिल्गिट बाल्टिस्तानमा भारतले आक्रामक नीति अपनाएमा सिक्किम मुद्दालाई फेरि चर्काउने चीनको सोच देखिन्छ । चीनले त्यही क्षेत्र भएर चीन पाकिस्तान आर्थिक कोरिडोर निर्माण गर्ने योजना अघि सारेको छ ।

चीनलाई गिल्गिट बाल्टिस्तान सामरिक दृष्टिले कति महत्त्वपूर्ण छ भन्ने थाहा छ । गिल्गिट बाल्टिस्तानलाई भारतले आफ्नै भूभाग मान्ने गरेको छ र पाकिस्तानले त्यहाँ चुनाव गराउने भनेपछि भारत अहिले आक्रोशित छ ।

कोरोनाभाइरसको व्यवस्थापन शुरूमै नगरेर संसारभरि फैलाएकोमा चीनलाई धेरैले आलोचना गरिरहेका बेलामा चीनले सीमा विवाद उत्पन्न गरेर भारतलाई समस्यामा पार्न खोजिरहेको हो । त्यसैले दुई देशका सैनिकबीचको झडपलाई सामान्य रूपमा हेर्न मिल्दैन । भारतसँग तनाव बढाउने योजनाबद्ध रणनीतिको एक अंगका रूपमा यसलाई बुझ्नुपर्छ । 

पूर्वोत्तर राज्यहरूमा सामरिक श्रेष्ठता कायम गर्ने नीति पनि चीनले लिएको हुन सक्छ । 

दोक्लम कब्जा गरेर भारतलाई चिकन नेकमा अप्ठ्यारो पार्ने रणनीति चीनले लिएको हुन सक्ने कमर आगाले बताएका छन् ।