३० असार २०८३, मंगलबार
कश्मीरमा आतंकवादीहरूलाई सहयोग गरिरहेको भनेर तालिबानसँग भारतले अहिलेसम्म चिसो सम्बन्ध राख्दै आएकोमा तालिबानले कश्मीर भारतको आन्तरिक मामिला भएको बयान दिएको छ ।
आफू कश्मीरमा भइरहेको आतंकवादी गतिविधिमा संलग्न नरहेको भनी तालिबानले स्पष्टीकरण दिएको छ । अन्य देशको आन्तरिक मामिलामा आफूले हस्तक्षेप नगर्ने उसको भनाइ छ ।
तालिबानको राजनीतिक शाखा इस्लामिक अमीरात अफ अफगानिस्तानका प्रवक्ता सुहैल शाहीनले सोमवार एउटा ट्वीट गरे, ‘तालिबान कश्मीरमा भइरहेको जिहादमा संलग्न रहेको भनी मिडियामा प्रकाशित खबरहरू गलत छन् । अन्य देशको आन्तरिक मामिलामा हस्तक्षेप नगर्ने इस्लामिक अमीरातको स्पष्ट नीति छ ।’
त्यसअघि मिडिया तथा सामाजिक सञ्जालमा तालिबानका प्रवक्ता जबीउल्लाह मुजैदले कश्मीर विवाद समाधान नहुन्जेल भारतसँगको मित्रता कायम हुन नसक्ने भनेको भनी लेखिएको पाइन्थ्यो । काबुलमा आफूहरूले सत्ता कब्जा गरेपछि कश्मीरलाई पनि लिने भनी प्रवक्ताले भनेको उल्लेख थियो ।
सूत्रहरूका अनुसार, सामाजिक सञ्जालमा आएका खबरको सत्यतथ्य जान्नका लागि भारतले तालिबानसँग सम्पर्क गर्दा यो स्पष्टीकरण जारी गरिएको हो । सामाजिक सञ्जालमा गरिएका दाबी झूटो भएको र तालिबानको वास्तविक अडानलाई त्यसले प्रतिबिम्बित नगर्ने भनी भारतलाई तालिबानले स्पष्ट पारेको देखिएको छ ।
अफगानिस्तानबाट अमेरिकी सैनिकहरू फिर्ता हुने समय नजिकिँदै गर्दा त्यहाँको राजनीतिक समीकरण तीव्र गतिमा बदलिइरहेको छ । अमेरिकाको अनुपस्थितिमा अफगानिस्तानमा प्रभाव जमाउन पाकिस्तान, चीन, इरान र रुसले साझेदारी गरेको देखिन्छ ।
अफगानिस्तानमा भारतको पोजिसन कमजोर देखिन्छ । तालिबान जहिल्यै पाकिस्तानको निकटवर्ती हो । तालिबान अफगानिस्तानको सत्तामा आएमा पाकिस्तानले तिनीहरूलाई भारतविरुद्ध उपयोग गर्नसक्ने डर भारतले लिएको छ ।
अनि अफगानिस्तानमा भारतले गरेको लगानी पनि खेर जान सक्ने जोखिम पनि रहेको छ ।
