भारतको महाराष्ट्रमा रहेको गढचिरौलीमा माओवादीहरूले सडक निर्माणमा खटिएका तीनवटा ट्रकमा आगो लगाएका छन् । त्यसअघि अहेरी तहसीलमा सडक र पुल निर्माणमा संलग्न गाडीहरूलाई पनि माओवादीहरूले डढाएका थिए । 

प्रहरी अधिकारीहरूले दिएको जानकारी अनुसार, सशस्त्र माओवादीहरूले तीनवटा ट्रकमा आगो लगाएर भागेका थिए । ठेकेदाराहरूलाई पर्याप्त सुरक्षा नपाइएसम्म काम नगर्न प्रहरीले निर्देशन दिएको भए पनि ठेकेदारले अटेरी गरेर काम अघि बढाउँदा माओवादीले आगजनी गरेका हुन् । 

गढचिरौलीमै आइतवार प्रहरी र नक्सल माओवादीहरूबीच भिडन्त भएको थियो । भिडन्तमा एक सई सहित दुईजना शहीद भएका थिए भने चार जवान घाइते भएका थिए । 

घटना गढचिरौलीको भारमगढस्थित कोपरशी होडरी जंगलमा भएको थियो । खोजी कारवाहीमा गएका जवानहरूमाथि २०० भन्दा बढी नक्सलीहरूले आक्रमण गरेका थिए ।