२४ जेठ २०८३, आइतबार
भारतप्रशासित लद्दाखको पांगोङ त्सो ताल र गालवान उपत्यकामा भारत र चीनले थप सैनिकहरू तैनाथ गरेपछि युद्धको आशंका गरिएको छ । विगत दुई हप्तादेखि उनीहरूले उक्त क्षेत्रमा आक्रामक गतिविधि देखाइरहेका छन् ।
भारतका शीर्ष सैन्य अधिकारीहरूले विकसित घटनाक्रमको लगातार निगरानी गरिरहेका छन् भने अमेरिकाले चिनियाँ सैनिकहरूको आक्रामक व्यवहारको आलोचना गरेको छ ।
संवेदनशील इलाकामा तनावग्रस्त स्थितिलाई मत्थर पार्नका लागि प्रयासहरू भने भइरहेका छन् ।
स्रोतहरूका अनुसार, चिनियाँ सैनिकहरूले पांगोङ त्सो नजिकका क्षेत्रमा आफ्नो उपस्थिति बढाएका छन् र तालमा थप डुंगाहरू ल्याएका छन् ।
दुवै पक्षले देमचोक र दौलत बेग ओल्डी लगायतका स्थानमा पनि थप सैनिकहरू ल्याएका छन्, स्रोतहरूले बताए ।
गालवान वरपरको क्षेत्र यी दुई देशबीच ६० वर्षदेखि नै विवादको केन्द्र हो । सन् १९६२ मा दुवैले यस क्षेत्रलाई बनद गरेका थिए ।
चिनियाँ पक्षले गालवान उपत्यका क्षेत्रमा निकै धेरै टेन्टहरू गाडेको अनि त्यसपछि भारतले उक्त क्षेत्रमा कडा निगरानीका लागि थप सैनिक पठाएको बताइएको छ ।
भारतले गालवान नदी नजिक महत्त्वपूर्ण सडक बनाएको विषयलाई चिनियाँ पक्षले कडा आपत्ति जनाएको स्रोतहरूको भनाइ छ ।
नेपालसँग लिपुलेकको विषयमा सीमा विवाद चलिरहेको बेलामा भारतले चीनसँग पनि आमनेसामने हुनुपरेको छ ।
द टाइम्स अफ इन्डियाबाट
