काठमाडौं १३ वैशाख - नेपाली काग्रेसका प्रभावशाली नेता एवं रक्षामन्त्री बालकृष्ण खाँणले जेठको पहिलो साता नेपाली काँग्रेसका सभापति शेरबहादुर देउवाको नेतृत्वमा नयाँ सरकार गठन हुने दावी गरेका छन् । सोही सरकारले नै नयाँ बजेट ल्याउने समेत उनले जिकिर गरे ।
बुधवार रिर्पोटस क्लवमा आयोजित कार्यक्रममा रक्षामन्त्री खाँणले जेठ पहिलो साता देउवाको नेतृत्वमा सरकार बन्ने दावी गरेका हुन् । खाँणले काँग्रेस र नेकपा (माओवादी केन्द्र) बीच कतिपय मतभेद र द्वन्द्व भए पनि तीनै तहको निर्वाचनसम्म दुई पार्टीको समीकरण रहिरहने दाबी गरे ।
देशमा शान्ति कायम, द्वन्द्व व्यवस्थापन र तीनै तहको निर्वाचन गर्नका लागि संविधान संशोधन विधेयक ल्याइएको उनले दावी गरे ।
मन्त्री खाँणले स्थानीय तहको निर्वाचनको सुरक्षा प्रदान गर्न नेपाली सेना प्रतिबद्ध रहेको बताए । विगतमा संविधानसभाको निर्वाचनमा पनि सेनाले सुरक्षा प्रदान गरेको उल्लेख गर्दै उनले स्थानीय तहको निर्वाचनमा पनि सुरक्षा प्रदान गर्न प्रतिबद्ध रहेको बताए ।
