०१ साउन २०८३, शुक्रबार
अमेरिकाको मायामीमा एक महिलाले अटिजम भएका छोरालाई नहरमा धकेलेर मारेको भिडियो सार्वजनिक भएको छ ।
प्याट्रिसिया रिप्ले नामक ४५ वर्षीया महिलाले छोरो अलेहान्द्रोको अपहरणको नाटक गर्दै उनलाई डुबाउने कोशिश गरेकी थिइन् । पहिलोपटक छोरालाई धकेल्दा अन्य मानिस आएर बचाएका थिए तर दोस्रो प्रयासमा छोरोको मृत्यु भएको प्रहरी अधिकारीहरूले शनिवार बताए ।
अलेहान्द्रो अटिजमबाट पीडित थिए र बोल्न सक्दैनथिए । उनको शरीर मायामीको नहरमा तैरिरहेको अवस्थामा शुक्रवार फेला परेको थियो । रिप्लेलाई हत्याको आरोपमा पक्राउ गरिएको छ ।
घटनाको भिडियो फूटेज युनिभिजनले प्राप्त गरेको थियो । त्यसमा रिप्लेले अलेहान्द्रोसँग हिँड्दै गर्दा उसको टाउको मुुसारेको र उसलाई नहरमा धक्का दिएको देखिन्छ । त्यसपछि उनी भाग्छिन् र छिमेकीहरूसँग आउँछिन् । उनीहरूले बालकलाई बचाउँछन् ।
त्यसपछि रिप्लेले आफ्नो छोरालाई मिक्कोसुकी गल्फ यान्ड कन्ट्री क्लबमा रहेको अर्को नहरमा लगेर छोरालाई धक्का दिएकी थिइन् ।
त्यहाँ चाहिँ छोरालाई बचाउनका लागि कोही पनि उपलब्ध नरहेको प्रहरीको भनाइ छ ।
मायामी–डेडकी न्यायाधिवक्ता क्याथरिन फर्नान्डेज रुन्डलले प्याट्रिसिया रिप्लेविरुद्ध कर्तव्य ज्यानको आरोप दर्ता गर्रिको र धरौटीरहित हिरासतमा राखिएको बताइन् ।
प्याट्रिसियालाई मृत्युदण्ड दिने माग गर्ने कि नगर्ने भन्ने विषयमा निर्णय नलिइसकेको उनको भनाइ छ ।
