काठमाडौं, १४ वैशाख– व्यवस्थापिका संसदको प्रक्रियामा अघि बढेको संविधान संशोधनलाई असफल पार्न प्रमुख प्रतिपक्षी दल नेकपा एमालेले नयाँ रणनीति बनाउने भएको छ ।
एमालेले संविधान संशोधन प्रस्तावलाई असफल बनाउन विपक्षी सना दलहरुसँग पुनः मोर्चाबन्दी गर्ने भएको छ । एमालेले संशोधन असफल पार्ने रणनीति बनाउन आज (बिहीबार) दिउँसो साना ९ दललाई पार्टी कार्यालय धुम्बाराहीमा बोलाएको छ ।
यसअघि सरकारले पहिलो संशोधन दर्ता गर्दा पनि एमालेले सरकारको विपक्षमा रहेका ९ दलसँग मोर्चाबन्दी कसेको थियो । राजनीतिक दलसम्बन्धी ऐनमा ३ प्रतिशत थ्रेसहोल्ड राख्ने विषयमा एमाले सहमत भएपछि उक्त मोर्चाबन्दी तोडिएको थियो । त्यतिबेला एमालेसँगको मोर्चाबन्दीमा रहेका साना दलहरुले एमालेबाट ‘धोका’ पाएको बताएका थिए ।
त्यतिबेलाको ९ दलीय गठवन्धनको एक घटक शिवलाल थापा नेतृत्वको राष्ट्रिय जनमुक्ति पार्टी लोकतान्त्रिक विजय गच्छदार नेतृत्वको मधेसी जनाधिकार फोरमसँग विलय भइसकेको छ । यस्तै सांसद सीमाकुमारी विक पूर्वप्रधानमन्त्री डा. बाबुराम भट्टराई नेतृत्वको नयाँ शक्तिमा गइसकेकी छन् ।
बुधबार मध्याह्नको बैठकका लागि एमाले अध्यक्ष ओलीले नै टेलिफोन गरेर विपक्षी साना दलका अध्यक्षहरुलाई बैठकमा बोलाएका छन् ।
