अमेरिकाको रिपब्लिकन पार्टीका एक सिनेटरले पश्चिमा मुलुकमा कोभिड–१९ को खोप बन्न चीनले अवरोध गरेको र त्यसलाई तुहाउन खोजेको प्रमाण रहेको दाबी गरेका छन् । 

रिक स्कटले अमेरिकाका जासूसी समुदाय र सेनासँग यसको प्रमाण रहेको बताए तर थप विवरण दिएनन् । 

चीनले भाइरसविरुद्ध चालेका कदमका विषयमा एउटा दस्तावेज जारी गरेको छ र अमेरिकालाई जनवरी ४ मा खबर दिएको बताएको छ । 

आइतवारसम्म कोरोनाभाइरसका कारण चार लाखभन्दा बढी मानिसको ज्यान गइसकेको छ । 

फ्लोरिडाका सिनेटर स्कटले बीबीसीको एन्ड्रु मार शोमा भने, ‘हामीले खोप बनाइहाल्नुपर्नेछ । दुर्भाग्यवश कम्युनिस्ट चीनले हाम्रो प्रयास तुहाउन वा ढिलो गराउन खोजिरहेको छ र त्यसको प्रमाण हामीसँग छ ।’

उनले थपे, ‘हामी अर्थतन्त्र खोल्न चाहन्छौं तर सबैजनालाई खोपको सुनिश्चितता भएमा ढुक्क तरिकाले खोल्न सकिन्थ्यो ।’

‘चीनले अमेरिका, बेलायत वा युरोपले खोप बनाएको देखिसहँदैन । चिनियाँहरू अमेरिका र संसारभरिका लोकतन्त्रको शत्रु बन्न खोजिरहेका छन् ।’

स्कट राष्ट्रपति डोनल्ड ट्रम्पका कट्टर समर्थक हुन् । उनले चिनियाँ प्रयासको प्रमाण जासूसी समुदायबाछ आएको तर कतिपय कुरा आफूले बताउन नमिल्ने बताए । 

उनले थपे, ‘बेलायत वा अमेरिकाले पहिला खोप बनाएमा हामी साझा गर्नेछौं । कम्युनिस्ट चीनले चाहिँ यसलाई साझा गर्ने छैन ।’

चीनले संसारमा प्रभुत्व जमाउने निर्णय लिएको पनि उनले बताए ।