स्वास्थ्य तथा जनसंख्या मन्त्रालयले कोभिड १९ का कारण पछिल्लो २४ घण्टामा १ जनाको मृत्यु भएको जनाएको छ ।

आइतवार नियमित प्रेस ब्रिफिङका क्रममा मन्त्रालयका प्रवक्ता डाक्टर जागेश्वर गौतमले गुल्मी धुर्कोटका ३६ वर्षीय पुरुषको कोभिड १९ का कारण मृत्यु भएको बताए ।

'गुल्मी धुर्कोटका जैशीथोकका ३६ वर्षीय पुरुषको निधन भएको छ,' उनले भने, 'गत जेठ १२ गते प्रदेश प्रयोगशाला रुपन्देहीमा उहाँमा कोरोना पुष्टि भएको थियो ।'

मृतक तम्घासको रेसुंगामा आइसोलेसनमा रहेका थिए । उनको आइसोलेसनमा उपचारका क्रममा शनिवार मृत्यु भएको हो । डाक्टर गौतमले उनी क्यान्सरबाट पनि पीडित रहेको बताए । मृतक भारतबाट आएका थिए ।

यससँगै कोभिड १९ का कारण नेपालमा मृत्यु हुनेको संख्या १९ पुगेको छ । 

प्रवक्ता गौतमले नेपालमा हालसम्म कोरोना जितेर घर फर्किनेहरूको संख्या ९ सय ७४ जना रहेको बताएका छन् । 

पछिल्लो २४ घण्टामा घर फर्किनेको संख्या ६१ रहेको छ ।