०९ असार २०८३, मंगलबार
गण्डकी प्रदेशमा मनाङसहित पछिल्लो २४ घण्टामा ४२ जना कोरोना संक्रमित देखा परेका छन् । यो संख्या एकैदिनमा देखिएको अहिलेसम्मकै उच्च हो । हिमालपारीको जिल्ला मनाङमा भने पहिलो पटक कोरोना संक्रमण देखा परेको हो ।
प्रदेश स्वास्थ्य निर्देशनालयले बिहीबार बिहान विज्ञप्ति प्रकाशित गरी नवलपरासी (बर्दघाट सुस्ता पूर्व) मा १८ जना, तनहुँमा १२ जना, गोरखामा ११ जना र मनाङमा १ जनामा संक्रमित फेला परेको पुष्टि गरेको छ ।
योसँगै गण्डकीमा कोरोना भाइरस संक्रमितको सख्या २ सय ८९ पुगेको छ ।
स्वास्थ्य निर्देशनालयका अनुसार मनाङमा मनाङ चामे गाउँपालिकामा कार्यरत ५७ वर्षीय पुरुष कर्मचारीमा संक्रमण देखिएको हो । उनको घर कपिलबस्तु बाडगंगा १४ रहेकोमा तराईबाट कार्यक्षेत्र फर्किने क्रममा संक्रमण देखिएको जनाइएको छ । अन्य ४१ जना भने भारतबाट फर्केर सम्बन्धित जिल्लाको क्वारेन्टाइनमा बस्दैआएका थिए ।
संक्रमित ४२ मध्ये १ जना महिला छन् । उनी गोरखाको पालुङटार नगरपालिकाकी ४० वर्षीया हुन् । पालुङटारकै अन्य ६ जना पुरुषमा संक्रमण देखिएको छ । उनीहरु ४६, ४५, ४२, २८, २३ र ४१ वर्ष उमेरका पुरुष हुन् । त्यस्तै गोरखाकै शहीद लखन गाउँपालिकाका ४ जना पुरुषमध्ये वर्ष ५४, ३१, ३८ र २७ का पुरुषमा कोरोना भाइरस संक्रमण भेटिएको छ ।
नवलपरासी (बर्दघाट सुस्ता पूर्व) को मध्यबिन्दु नगरपालिकाका वर्ष २१ देखि ४५ उमेर समूहका १५ जना पुरुषमा कोरोना देखिएको छ भने गैँडाकोटका ३ जना छन् । तीमध्ये भरतपुर अस्पतालमा उपचार क्रममा गरिएको परीक्षणमा वर्ष २८ का पुरुषमा संक्रमण देखा परेको हो भने अन्य २ जनाको उमेर समूह खुलेको छैन ।
त्यस्तै, तनहुँको ऋसिङ गाउँपालिकाका ७ जनामध्ये वर्ष २० देखि ४० उमेर समूहका छन् । शुक्लागण्डकी नगरपालिकाका १८ वर्षीय तथा भानु नगरपालिकाका ४ जनामध्ये वर्ष २२, ४०, ४२ र ५२ वर्षीय पुरुष छन् ।
गण्डकीमा एकै दिनको अवधिमा गत जेठ २५ मा ३८ जनासम्म व्यक्तिमा कोरोना देखिएको थियो ।
गण्डकीका ११ जिल्लामध्ये मुस्ताङबाहेक सबै जिल्लामा कोरोना फैलिन पुगेको छ । गण्डकीमा कुल संक्रमितमध्ये हालसम्म २१ जना निको भइ घर फर्केका छन् । १ जनाको मृत्यु भएको छ ।
