बेल्जियमको इतिहासमा पहिलोपटक बहालवाला राजाले उपनिवेश कालमा देशले अफ्रिकामा गरेको हिंसाका विषयमा माफी मागेका छन् । मंगलवार राजा फिलिप्पेले पश्चात्ताप व्यक्त गरेका हुन् । 
 

कंगोका राष्ट्रपति फिलिक्स चिसेकेदीलाई एक पत्र लेखेर राजाले कंगोमाथि उपनिवेश कालमा बेल्जियमले गरेको हिंसा तथा क्रूरताका लागि गहिरो पश्चात्ताप व्यक्त गरेका हुन् । कंगो स्वतन्त्र भएको ६०औं वार्षिकोत्सवका अवसरमा उनले उक्त पत्र पठाएका हुन् । 
‘

दुई देशबीचको सम्बन्धलाई थप मजबूत बनाउन तथा थप फलदायी मित्रता विकास गर्न हामीले साझा इतिहासका विषयमा सत्य तथा इमान्दार कुराकानी गर्नुपर्ने हुन्छ,’ फिलिप्पेले भने । 

बेल्जियमले उपनिवेशवादी विगतलाई पुनर्मूल्यांकन गर्नुपर्ने भन्दै माग उठिरहेको बेलामा फिलिप्पेको पत्र आएको हो । बेल्जियमका राजा लियोपोल्ड दोस्रोको शासनकालमा लाखौं अफ्रिकीहरूको हत्या गरिएको थियो । 

अहिले अमेरिकामा प्रहरीद्वारा मारिएका काला जातिका पुरुष जर्ज फ्लोयडलाई न्याय दिलाउन भइरहेका प्रदर्शनमा लियोपोल्डका कैयौं मूर्ति भत्काइएका छन् । बेल्जियमबाट ती राजाका सबै मूर्ति हटाउन निवेदन समेत परेको छ ।