इरानले गोपनीय सूचनाहरू अमेरिकालाई बेच्ने मामिलामा दोषी पाइएका रक्षा मन्त्रालयका एक पूर्व कर्मचारीलाई फाँसी दिएको छ ।

इरानी न्यायिक व्यवस्थाका प्रवक्ता घोलामहोसेन इस्माइलीले स्थानीय सञ्चारमाध्यमहरूलाई रेजा असगरी नामका पूर्व कर्मचारीलाई गत हप्ता फाँसी दिइएको बताएका छन् ।

इस्माइलीले भने, ‘असगरीले इरानी मिसाइल कार्यक्रमको जानकारी अमेरिकी सेन्ट्रल इन्टेलिजेन्स एजेन्सी (सीआइए) दिने गरेका थिए । उनले यस्तो काम रक्षामन्त्रालयको एयरस्पेस डिभिजनबाट सन् २०१६ मा अवकाश प्राप्त गरेपछि गर्न शुरू गरेका थिए ।’

उनले असगरीलाई कहिले हिरासतमा लिइएको थियो र फाँसीको सजाँय कहिले सुनाइएको थियो भन्नेबारेमा जानकारी दिएनन् ।