१८ असार २०८३, बिहीबार
अमेरिकाको कोलोराडोमा एक लोखर्केमा ब्युबोनिक प्लेग नामक खतरनाक महामारीको संक्रमण भेटिएको छ ।
दश दिनअघि चीनको इन्नर मंगोलियामा पनि ब्युबोनिक प्लेग फैलिएको खबर आएको थियो ।
ज्ञात इतिहासमा ब्युबोनिक प्लेग संसारमा तीनपटक फैलिएको छ । पहिलोपटक यसले पाँच करोड, दोस्रोपटक युरोपको एक तिहाइ जनसंख्या र तेस्रोपटक ८० हजारजनाको ज्यान लिएको थियो ।
कोलोराडोको मोरिसन बस्तीमा चार दिनअघि लोखर्केमा ब्युबोनिक प्लेग देखिएको हो ।
सरकारले मानिसहरूलाई सतर्क रहन चेतावनी जारी गरेको छ । अनि घरमा मुसा, लोखर्के र न्याउरीमुसाबाट टाढै रहन भनेको छ ।
ब्युबोनिक प्लेग मुसामा भेटिने ब्याक्टेरियाबाट फैलिन्छ । ब्याक्टेरियाको नाम यर्सिनिया पेस्टिस ब्याक्टेरियम हो । यसले फोक्सो र रक्तप्रणालीमा आक्रमण गर्छ ।
यसले शरीरका अंगलाई कालो बनाएर सडाइदिन्छ र फतफत झारिदिन्छ ।
यसले गर्दा शरीरमा असह्य पीडा र चर्को ज्वरो आउँछ । दुईतीन दिनमा फोका निस्कन थाल्छ । १४ दिनमा फोका पाक्छन् । अनि शरीर दुखेको दुख्यै गर्छ ।
