काठमाडौं, १९ वैशाख –प्रवुद्व समूहले हालै सर्वोच्च अदालत लगायतका स्वतन्त्र निकायहरूमाथि भएका हस्तक्षेपले लोकतन्त्र र शक्ति पृथकीकरणको मान्यताको धज्जी उडाएको ठहर गरेको छ ।
मुलुकमा सृजना गरिएको संवैधानीक र राजनीतिक संकटप्रति गम्भीर ध्यानाकर्षण भएको जनाउँदै उक्त समूहले राष्ट्रको सार्वभौमसत्ता र स्वतन्त्रताको रक्षाका निम्ति सम्पूर्ण राष्ट्रप्रेमीलाई एकजुट हुन समेत आग्रह गरेको छ ।
उक्त समूहको सोमवार बसेको बैठकले आसन्न स्थानीय चुनाव एकै चरणमा गर्न सरकारलाई सुझाव दिएको छ ।
दुई चरणमा चुनाव गर्दा त्यसले चलखेल निम्त्याउने ठहर गर्दै समूहले तोकिएको मितिमा एकै चरणमा स्थानीय तहको निर्वाचन गर्न सुझाव दिएको हो ।
‘समयमै स्थानीय तहको निर्वाचन एकैचरणमा सम्पन्न गरिनुपर्छ,’ उक्त समूहद्वारा जारी वक्तव्यमा भनिएको छ, ‘अन्यथा देश थप अन्योल र संकटको भूमरीमा फस्ने निश्चित छ ।’
संविधान कार्यान्वयनको चरणमा रहेको अवस्थामा मुलुकमा संकटको कालो बादल मडारिएको भन्दै प्रवुद्व समूहले बहुराष्ट्रिय राज्यको मान्यता लगायतका मुलुकको स्वाधिनता र अखण्डता समाप्त पार्ने छदम्भेषी गतिविधि निस्तेज पार्नुपर्ने आवश्यकतासमेत औंल्याएको छ ।
मुलुक गम्भीर संकटकामाझ गुज्रेको भन्दै उक्त समूहले सम्पूर्ण राष्ट्रप्रेमी नागरिकलाई एकजुट हुन आग्रह गरेको छ । संवैधानीक, राजनीतिक लगायत देशमा सृजना गरिएको संकटमाथि पनि हाम्रो गम्भीर ध्यानाकर्षण भएको छ । राष्ट्रको सार्वभौमसत्ता र स्वतन्त्रताको रक्षाका निम्ति सम्पूर्ण राष्ट्रप्रेमीलाई एकजुट हुन समेत आग्रह गर्दछौं ।
