मंगलवार बिहान ११ बजेका लागि बोलाइएको स्थायी कमिटी बैठक स्थगित भएपछि प्रधानमन्त्री एवं नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच छलफल शुरू भएको छ । 

स्थायी कमिटीको बैठक स्थगित भएपछि ओलीलाई भेट्न प्रचण्ड बालुवाटार पुगेका हुन् ।

खुमलटारमा सोमवार भएको प्रचण्ड–माधव नेपाल समूहको छलफलमा स्थायी कमिटी बैठक नरोक्ने सहमति भएको थियो ।

ओली नआएपनि बहुमतका आधारमा निर्णय गरेर अगाडि बढ्ने निर्णय सो समूहले गरेको थियो । तर बिहान साढे १० बजे बालुवाटारबाट सूचनामार्फत बैठक स्थगित भएको जानकारी गराइएको थियो । 

सहमति जुटिनसकेकाले ओली समूह भने मंगलवारको बैठक स्थगित गरेर थप छलफल गर्नुपर्ने पक्षमा छ । 

असार १० गतेबाट शुरू स्थायी कमिटी बैठक पटक–पटक स्थगित हुँदै आएको छ । असार १८ गतेदेखि स्थगित बैठक साउन ६ गते केहीबेर बसेर आजसम्मका लागि स्थगित भएको थियो । 

साउन ६ गते बैठक स्थगित भएपछि ओली र प्रचण्डबीच एकपटक मात्र छलफल भएको छ ।

साउन ९ गते ओलीसँगको छलफलमा कुनै सहमति जुट्न नसकेपछि प्रचण्डले सोही दिन पार्टी समस्यामा रहेको बताएका थिए ।

ओली–प्रचण्ड भेटपछि मात्र बैठकको टुंगो लाग्नेछ ।