२७ असार २०८३, शनिबार
स्थायी कमिटी बैठकका लागि भनेर बालुवाटार पुगेका स्थायी कमिटी सदस्यहरूलाई बालुवाटारमा कुराएर अध्यक्ष पुष्पकमल दाहाल ‘प्रचण्ड’ र झलनाथ खनाल प्रधानमन्त्री एवं अध्यक्ष केपी शर्मा ओलीलाई भेट्न पुगेका छन् ।
स्थायी कमिटी बैठकका लागि भन्दै प्रचण्ड–माधवकुमार नेपाल समूहका नेताहरू बालुवाटार पुगेका थिए ।
प्रधानमन्त्री ओलीका प्रेस सल्लाहकार सूर्य थापाले मंगलवारको स्थायी कमिटी बैठक स्थगित भएको जानकारी गराएका थिए । तर प्रचण्ड–नेपाल समूहका स्थायी कमिटी सदस्यहरू बालुवाटार पुगेका छन् ।
सदस्यहरूलाई बैठक कक्षमा कुराएर प्रचण्ड र झलनाथ खनाल ओलीलाई भेट्न पुगेका हुन् । स्थायी कमिटी बैठक बस्ने नबस्ने अन्यौल छ ।
असार १० गते शुरू भई पटक–पटक स्थगित भएको नेकपा स्थायी कमिटी बैठक आजका लागि बोलाइएको थियो ।
नेकपा विवाद उत्कर्षमा पुगेको समयमा उपाध्यक्ष वामदेव गौतमले भने प्रतिनिधि सभाको बाँकी कार्यकालभरी केपी शर्मा ओली नै प्रधानमन्त्री रहने र तथा एकता महाधिवेशन नहुञ्जेल ओली अध्यक्ष पनि रहने गरी सहमतिको प्रस्ताव अगाडि सारेका छन् ।
पार्टीको विग्रह रोक्नका लागि भन्दै मंगलवार ६ बुँदे सहमतिको प्रस्ताव सार्वजनिक गर्दै गौतमले अहिले ओलीको राजीनामा माग गर्न नहुने बताएका हुन् ।
गौतमले पार्टीको महाधिवेशन नहुञ्जेल पुष्पकमल दाहाल प्रचण्डलाई पार्टीको सम्पूर्ण कार्यकारी अधिकार रहने प्रस्ताव गरेका छन् ।
गौतमको यो प्रस्तावपछि नेकपाभित्र नयाँ तरंग ल्याएको छ ।
