२९ जेठ २०८३, शुक्रबार
अमेरिकी सरकारले शावरबाट आउने पानीको मात्रा बढाउनका लागि शावरहेडको परिभाषा परिवर्तन गर्ने प्रस्ताव ल्याएको छ । राष्ट्रपति डोनल्ड ट्रम्पले राम्ररी कपाल नुहाउन नपाइएको गुनासो गरेपछि यो परिवर्तन ल्याउन लागिएको हो ।
सन् १९९२ मा ल्याइएको एक कानूनअन्तर्गत अमेरिकाका बाथरूममा भएका शावरहेडबाट एक मिनेटमा ९.५ लिटरभन्दा बढी पानी निकाल्न पाइँदैन ।
उपभोक्ता र संरक्षणवादी समूहहरूले यसमा संशोधनको प्रस्ताव अनावश्यक कदम भएको तर्क गरेका छन् ।
ट्रम्पले अघिल्लो महिना गुनासो गरेपछि ऊर्जा मन्त्रालयले कानून संशोधनको प्रस्ताव ल्याएको थियो ।
‘शावरहेडको कुरा नि । नुहाउन जाँदा पानी नै आउँदैन । हात धुन खोज्यो, पानी आउँदैन । के गर्नु गर्नु ? लामो समय शावरमुनि उभिइरहनु त ? किनकि मेरो कपाल पर्फेक्ट हुनुपर्छ । पर्फेक्ट,’ उनले भने ।
ऊर्जा संरक्षण समूह अप्लायन्स स्ट्यान्डर्ड्स अवेरनेस प्रोजेक्टका कार्यकारी निर्देशक एन्ड्रु डीलास्कीले मन्त्रालयको प्रस्ताव मूर्खतापूर्ण भएको बताए ।
‘राष्ट्रपतिलाई मज्जाले नुहाउन मन लागेको भए गजबले पानी फाल्ने शावरहेड किने भैगो नि । बढी पानी नाश गर्ने उपद्रो किन गर्नुपर्यो ?’ उनले भने ।
मन्त्रालयको प्रस्ताव कार्यान्वयन गरियो भने पनि अदालतमा त्यसविरुद्ध मुद्दा पर्ने रोयटर्स समाचार संस्थाले लेखेको छ ।
