१३ असार २०८३, शनिबार
सिन्धुपाल्चोकको जुगल गाउँपालिकामा भइरहेको ३६ मेगावाटको अपर बलेफी जलविद्युत् आयोजनाको सुरुङ खन्ने काम सम्पन्न भएको छ ।
शिवश्री हाइड्रो पावर कम्पनीद्वारा निर्माण भइरहेको आयोजनाको ४ हजार ५०० मिटर सुरुङ निर्माणको काम सम्पन्न भएको आयोजनाले जनाएको छ ।
सो गाउँपालिका–३ स्थित पाङरपु र लिदी नजिक निर्माण गरिएको बाँधको काम ८५ प्रतिशत सम्पन्न भएको छ । वडा नम्बर २ को बैकुण्ठेमा निर्माण गरिएको विद्युत् गृहको कामसमेत सम्पन्न भएको छ ।
विभिन्न प्राकृतिक विपद् र कोभिड–१९ को महामारीका कारण निर्धारित समयभन्दा केही पछि धकेलिएको आयोजनाबाट आगामी माघसम्म विद्युत् उत्पादन गरिने आयोजनाका कार्यकारी अध्यक्ष उमेश कसजुले जानकारी दिए ।
लकडाउनका कारण मशिनरी सामान राजधानी भित्रिसके पनि आयोजना स्थलमा पुर्याउन नसकिएको कम्पनीले जनाएको छ । २२ किलोमिटर प्रसारण लाइनको ६० टावरमध्ये ५० टावरको फाउन्डेसन तयार भइसकेको छ ।
शुरूमा ६ अर्ब रुपैयाँमा निर्माण भएको आयोजनाको लागत बढेर हाल ७ अर्ब पुगेको जनाइएको छ ।
