१७ असार २०८३, बुधबार
कल्पना गर्नुस्, नौवटा सूर्यले एकैपटक ऊर्जा छोडे भने के होला ? यस्तो घटना हाम्रो ब्रह्माण्डमा भएको थियो र त्यसको ताप अहिले आएर पृथ्वीले अनुभव गरेको छ ।
यो ताप एक तीव्र ऊर्जा लहर अर्थात् ग्य्राभिटेसनल वेभका रूपमा आयो । दुईवटा ठूला ब्ल्याक होलको महाविलयका कारण यो घटना भएको थियो । उक्त घटनाको संकेत पृथ्वीमा आइपुग्न सात अर्ब वर्ष लाग्यो ।
यति लामो यात्रा गरेर आएको भए पनि यो संकेत निकै शक्तिशाली थियो । यसले पोहोर साल अमेरिका र इटलीमा राखिएका लेजर डिटेक्टरलाई हल्लादियो ।
घटना पोहोर सालको मे २१ मा भएको थियो र त्यसको विस्तृत विवरण भर्खरै मात्र प्रकाशित भएको छ । अनुसन्धाताहरूका अनुसार, दुई ठूला ब्ल्याक होलको विलयबाट एउटा ठूलो ब्ल्याक होल बन्यो जसको ताप सूर्यभन्दा १४२ गुणा बढी थियो ।
ठोकिने क्रममा लगभग नौवटा सूर्य बराबरको पदार्थ ऊर्जामा परिणत भयो ।
ब्ल्याक होल भनेको अन्तरिक्षको त्यो क्षेत्र हो जहाँ गुरुत्वाकर्षण निकै प्रबल हुन्छ । यसमा फसेको कुनै पनि वस्तु बाहिर निस्कन सक्दैन ।
ठूलो ताराको मध्य भाग भत्केपछि ब्ल्याक होल बन्छ । कुनै कुनै ब्ल्याक होलको द्रव्यमान सूर्यभन्दा अर्बौं गुणा बढी हुन्छ ।
चक्राकार ब्ल्याक होलहरू एकअर्कामा विलय हुँदा ग्य्राभिटेसनल वेभ उत्पन्न हुन्छन् । यी अन्तरिक्षमा हलचल गर्ने अदृश्य र तीव्र लहर हुन् र प्रचण्ड ब्रह्माण्डीय घटनाबाट यिनको जन्म हुन्छ ।
ब्ल्याक होल विलय भएको घटना पत्ता लगाउने प्रविधि बनाउन दशकौं लागेको थियो ।
ग्य्राभिटेसनल वेभ पत्ता लगाउनका लागि अमेरिकामा लिगो र इटलीमा भर्गो डिटेक्टर राखिएका छन् । यी दुईले नै विशाल ब्ल्याक होलको खोजी गरेका हुन् ।
लिगो र भर्गोका लेजर इन्टरफेरोमिटर उपकरणले अन्तरिक्षका कम्पनहरू सुन्ने गर्छन् । त्यस्ता कम्पन ब्रह्माण्डीय घटनाबाट उत्पन्न हुन्छन् ।
एक सेकेन्डको दशौं भाग जति समय अवधिका लागि तीव्र संकेत दर्ज भएको थियो ।
