२३ जेठ २०८३, शनिबार
जंगलमा भालुसँग जम्काभेट भएमा के गर्नुपर्छ भनी अध्ययन गरिरहेका एक बालकले इटलीको पहाडमा साँँच्चै भालुको सामना गरेका छन् ।
१२ वर्षीय पशुप्रेमी अलेस्सान्द्रो पहाडमा हिँड्दै गर्दा विशाल भालुले पछ्याएपछि शान्त रहँदै बिस्तारै गए ।
उनले यो नाटकीय क्षणको भिडियो पनि खिचेका छन् ।
उत्तरपूर्वी इटलीको सुडटिरोलमा परिवारसँग वनभोज खान उनी गएका थिए ।
भिडियोमा बालक पहाडमुनि बिस्तारै झर्दा उनीपछाडि झाडीबाट एउटा भालुको टाउको देखिन्छ ।
अलेस्सान्द्रो पछाडि फर्केर हेर्छन् अनि भालुले उनलाई पछ्याउन थाल्छ । तर उनी आत्तिदैनन् र सिकेको कुरा व्यवहारमा उतार्छन् ।
उनी जाँदै गर्दा भालु पछिल्ला खुट्टाहरूमा उभिन्छ ।
ती बालकले लकडाउनमा घरैमा बस्दा जंगलमा भालु भेटियो भने के गर्नुपर्छ भनी पढेका थिए । उनका काकाले उनी पशु तथा जंगल एकदमै मन पराउने बताए ।
स्पोरमिनोर नामक गाउँमा पढ्ने ती बालकले भने, ‘भालुलाई खतरामा परेको भान नदिइकन त्यहाँबाट हिँड्नुपर्ने थियो । मैले भालुको आँखामा हेरिनँ र भालुले म उसको शत्रु हैन भनी बुझ्यो । अहिले म संसारको सबभन्दा खुशी बालक हुँ ।’
घटनापछि भालु त्यस ठाउँबाट गएको र कसैलाई पनि चोटपटक नलागेको बताइएको छ । स्थानीय सञ्चारमाध्यमका अनुसार, उक्त क्षेत्रमा ८० देखि ९० जंगली भालु बस्छन् ।
