कोरोना संक्रमण नियन्त्रणका लागि सरकारले किनेको स्वास्थ्य सामग्री खरिदमा भएको अनियमितताबारे छलफल गर्न प्रतिनिधि सभाको सार्वजनिक लेखा समितिले आगामी बैठकमा स्वास्थ्यमन्त्री भानुभक्त ढकाललाई बोलाउने भएको छ ।

स्वास्थ्य सामग्री खरिदमा भएको अनियमितताबारे अध्ययन गरिरहेको लेखा समितिले मन्त्री ढकाल र सचिवलाई समितिमा बोलाउने निर्णय गरेको हो ।

‘यसअघिको बैठकमा भएको छलफल अनुसार आगामी बैठकमा माननीय मन्त्रीज्यू र सचिवज्यूलाई बोलाउने निर्णय भएको हो,’ लेखा समितिका सचिव डा. रोजनाथ पाण्डेले लोकान्तरसँग भने । 

समितिले यसअघि ओम्नी ग्रूपसँग भएको स्वास्थ्य सामाग्री खरिदबारे तत्कालीन स्वास्थ्य सचिव र स्वास्थ्य सेवा विभागका तत्कालीन महानिर्देशकसँग छलफल गरेको थियो । लेखा समितिमा उपस्थित उनीहरूले कोरोना रोकथाम नियन्त्रण सम्बन्धी उच्चस्तरीय समन्वय समितिको दबाबमा खरिद प्रक्रिया अगाडि बढाएको बताएका थिए । 

प्रारम्भिक अध्ययनमा लेखाले स्वास्थ्य उपकरण खरिदमा बदमासी भएको निष्कर्ष निकालेको थियो । बैठकको मिति तय भइनसके पनि अर्को हप्ता समितिको बैठक बस्ने उनले बताए । 

बिहीवार बसेको लेखा समितिको बैठकमा वैज्ञानिक वन व्यवस्थापनका नाममा भइरहेको वन फडानी अनुगमन गर्न गठित समितिले प्रतिवेदन बुझाएको सचिव डा. पाण्डेले जानकारी दिए ।