भारतमा अभिनेत्रीबाट सांसद बनेकी नुसरत जहाँले इन्स्टाग्राममा देवी दुर्गाको स्वरूप धारण गरेपछि ज्यान मार्ने धम्की आएको भन्दै बेलायतमा रहेका भारतीय उच्चायुक्तसँग सुरक्षा मागेकी छन् । 

उनले भारतको विदेश मन्त्रालय र पश्चिम बंगाल सरकारलाई पनि यस विषयमा सतर्क गराएकी छन् । 
 

बसिरहातबाट तृणमूल कांग्रेसको टिकटबाट सांसद बनेकी नुसरत देवी बनेपछि मुसलमान कट्टरपन्थीहरू रिसाएका छन् । उत्तर प्रदेशमा रहेको देवबन्द शहरमा देशकै सबभन्दा ठूलो मदरसा छ र त्यहाँका धर्मगुरुहरूले उनलाई पश्चात्ताप गर्न भनेका छन् । 
 

नुसरत एक बंगाली फिल्मको शूटिङका लागि आइतवार लन्डन पुगेकी छन् । उनी अक्टोबर १६ सम्म त्यहाँ हुनेछिन् । 

उनको टीमका एक सदस्यले यस्ता किसिमका धम्कीहरू आइरहने गरेको र बेवास्ता गर्ने गरेको बताए । तर अहिले नुसरत देशबाहिर रहेकाले लन्डनस्थित भारतीय उच्चायोगसँग सुरक्षा मागेको ती व्यक्तिले बताए । 
 

देवबन्दमा मौलाना इशक गोराले भने, ‘नुसरत जहाँ यस्तै हर्कत गर्न मन पराउँछिन् । यी कुराहरू इस्लाममा प्रतिबन्धित छन् । उनको कामबाट मानिसहरूलाई चोट लागेको छ । उनले पश्चात्ताप गर्नुपर्छ ।’
 

नुसरत अहिले स्वस्तिक संकेत नामक फिल्मको प्रिप्रोडक्सनमा छिन् । 

उनले पोहोर साल पनि सिन्दूर लगाएर दुर्गा पूजामा भाग लिएकोमा मुस्लिम कट्टरपन्थीहरूले आलोचना गरेका थिए ।