२८ असार २०८३, आइतबार
कोरोनाभाइरसको उपचार गराइरहेका अमेरिकाका राष्ट्रपति डोनल्ड ट्रम्प आइतवार वाल्टर रीड नेसनल मिलिटरी मेडिकल सेन्टरबाट केही समयका लागि बाहिर निस्केका छन् ।
उनले सुरक्षाकर्मीहरूका साथ एसयूभी गाडी चढेर आफ्ना समर्थकहरूलाई हात हल्लाएका थिए ।
अस्पताल बाहिर भेला भएका समर्थकहरूतिर उनले गाडीभित्रैबाट हात हल्लाएका थिए । उनले एसयूभीको पछिल्लो सीटमा मास्क लगाएर बसेको देखिन्थ्यो । आफ्नो स्वास्थ्यस्थिति सही रहेको भनी देखाउनका लागि उनले यो स्टन्ट गरेको बताइएको छ ।
तर उनको यो निर्णयले उनका सुरक्षाकर्मीहरूलाई कोरोनाको जोखिममा पारेको छ र उनले यस रोगको संक्रामक प्रकृति तथा जोखिमलाई गम्भीरताका साथ नलिएको देखिएको छ ।
ट्रम्पका चिकित्सकहरूले आइतवार उनको अवस्थाका विषयमा पत्रकारहरूलाई बताएका थिए । उनको अक्सिजन स्तर चिन्ताजनक रूपमा घटेको बताइएको छ ।
चीफ अफ स्टाफले पत्रकारहरूलाई ट्रम्पको महत्त्वपूर्ण अंगले काम नगरिरहेको भनी बताएपछि उनी एकदमै रिसाएका थिए । त्यसैले आइतवार सार्वजनिक रूपमा देखिएर उनले आफू रोगको नियन्त्रणमा नरहेको देखाउन खोजेका छन् ।
ट्रम्पको उपचार गरिरहेका एक चिकित्सक डा जेम्स फिलिपले गाडीमा सुरक्षाकर्मी लिएर यस्तो अवस्थामा घुमेकोमा कठोर आलोचना गरेका छन् ।
‘राष्ट्रपतिको एसयूभी बुलेटप्रूफ मात्र नभई रासायनिक आक्रमण रोक्नका लागि सील समेत गरिएको छ । गाडीभित्र कोभिड–१९ संक्रमणको जोखिम अत्युच्च हुन्छ । यस्तो गैरजिम्मेवारीपना आश्चर्यजनक छ । सिक्रेट सर्भिसका सुरक्षाकर्मीहरूलाई यस्तो हर्कत गर्न बाध्य बनाइएकोमा मेरो सहानुभूति उनीहरूप्रति छ,’ फिलिप्सले ट्वीट गरे ।
ट्रम्पले अस्पतालमा अन्यलाई, चालकलाई अनि सुरक्षाकर्मीलाई जोखिममा पारेको भए पनि ह्वाइट हाउसका प्रवक्ता जुड डीयरले राष्ट्रपतिलाई बाहिर जान दिनका लागि स्वास्थ्यकर्मीहरूले अनुमति दिएको बताए । अनि यात्राका क्रममा पर्याप्त पूर्वसतर्कताहरू अपनाइएको जानकारी पनि उनले दिए ।
