उत्तर कोरियाका नेता किम जोङले कोरोनाभाइरस लगायतका संकटका बेलामा देशलाई सही दिशानिर्देश गर्न नसकेको भन्दै आँसु चुहाउँदै माफी मागेका छन् । 

यसरी किमले माफी माग्नु दुर्लभ घटना हो । 

सत्तारूढ वर्कर्स पार्टीको ७५औं वर्षगाँठका अवसरमा आइतवार आयोजित विशाल सैन्य परेडलाई सम्बोधन गर्दै किमले चश्मा खोले अनि आँसु पुछे । उनको सरकारमाथि दबाब बढिरहेको संकेत यसबाट पाइएको विश्लेषकहरूले बताएका छन् । 

‘जनताले आकाशभन्दा अग्लो अनि समुद्रभन्दा गहिरो विश्वास ममाथि राखेका छन् तर मैले यस विश्वासमा खरो उत्रिन सकिरहेको छैन,’ उनले बताए । ‘त्यसका लागि म हृदयदेखि नै माफी माग्छु ।’

आफ्ना पिता र हजुरबुवालाई उद्धृत गर्दै किमले थपे, ‘दुई महान् कमरेडहरू किम इल–सुङ र किम जोङ–इलको आदर्शलाई पछ्याउँदै यस देशको नेतृत्व गर्ने जिम्मेवारी मलाई दिइएको भए पनि मेरो प्रयास र इमान्दारिता हाम्रा जनताको जीवनको दुःखकष्टलाई मुक्त गर्न पर्याप्त छैन ।’

राजधानी प्योङयाङमा आयोजित उक्त परेडमा अनपेक्षित रूपमा नयाँ अन्तर्महादेशीय ब्यालिस्टिक क्षेप्यास्त्र प्रदर्शन गरिएको थियो । 

किमले उक्त अवसरमा आफ्नो सम्बोधनको अधिकांश भाग उत्तर कोरियाली जनताको सहानुभूति बटुल्नका लागि खर्च गरेको विश्लेषकहरूले बताएका छन् । 

सम्बोधनमा ‘गम्भीर चुनौती’, ‘अनगन्ती कठिनाइहरू’ र ‘अभूतपूर्व विपत्तिहरू’ जस्ता खतरनाक शब्दावली परेको पाइएको छ । 

उत्तर कोरियाको सबभन्दा धेरै व्यापार चीनसँग हुन्छ तर कोरोना महामारीका कारण सीमाहरू बन्द गर्नुपर्दा व्यापारमा नाटकीय कमी आएको छ । प्योङयाङले देशमा कोरोनाको एउटा पनि घटना नभएको बताएको छ । 

किमले आणविक र क्षेप्यास्त्र कार्यक्रमहरू चलाइरहेकाले अन्तर्राष्ट्रिय प्रतिबन्ध कायम छन् । त्यससँगै प्राकृतिक विपतका कारण क्षति पुगेकाले पनि किमका समस्याहरू बढेर गएका छन् । 

‘यस्तो अवसरमा उनले किन आँसु चुहाए भन्ने विषयमा विचार गर्नु महत्त्वपूर्ण छ,’ कोरियन इन्स्टिच्युट फर नेसनल युनिफिकेसनको नर्थ कोरिया डिभिजनका निर्देशक होङ मिनले बताए । ‘किमको नेतृत्वमा चुनौती आइरहेको भन्ने यस सन्देशको निहितार्थ हो ।’

उत्तर कोरियाको सैन्य शक्तिको प्रमाणस्वरूप सैनिक, क्षेप्यास्त्र र ट्यांकहरू प्रदर्शन गरिएको भए पनि किमले कोभिड–१९ का कारण संसारभरि दुःख पाइरहेका मानिसको समर्थन गरे अनि दक्षिण कोरियासँगको सम्बन्ध सुधार्ने आशा व्यक्त गरे । 
 

किमले आफूहरूमाथि जोखिम आइलागेमा आणविक शक्ति पूर्णतया परिचालन गर्ने भनी सम्बोधनका क्रममा चेतावनी दिए तर वाशिङटनलाई सीधासीधा आलोचना गरेनन् ।