३१ जेठ २०८३, आइतबार
अमेरिकामा सम्पन्न राष्ट्रपतीय निर्वाचनमा रिपब्लिकन उम्मेदवार डोनाल्ड ट्रम्प विजयी भएका छन् । ट्रम्प विजयी भएपछि अमेरिकामा बस्ने नेपालीको बिषयमा चिन्ता व्यक्त गरिएको छ । अहिले चर्चा गरिएजस्तो अमेरिकामा डोनाल्ड ट्रम्पले राष्ट्रपति पद जित्ने वित्तिकै नेपालीलाई अप्ठ्यारो पर्ने अवस्था छैन । अमेरिका एकदमै ठूलो देश हो । भूगोलकै हिसावले भारत भन्दा झण्डै चार गुणा ठूलो छ अमेरिका ।
गैरकानुनी आप्रवासीहरूलाइ घर पठाउने भन्ने कुरा तत्काल कार्यान्वयनको सम्भावना छैन, बरु त्यसमा अनेकन समस्या छन् । त्यो कारणले गर्दा नेपालीहरूलाई फाइदा पुुग्न सक्छ । ट्रम्पले मुस्लिमहरूलाई केही समयको लागि भिसा नदिने भनेका छन् त्यसैले त्यो भयो भने भिसा लिएर अमेरिका जाने नेपालीको संख्या बढ्न सक्छ ।
डा. जयराज आचार्यजस्तै डिभीमा अमेरिकाले नेपालको कोटा बढउन सक्छ भने विद्यार्थी भिसामा पनि केही खुकुलोपन आउन सक्छ । अहिले पनि अमेरिका नै विद्यार्थी भिसामा धेरै बिद्यार्थी पठाउने देश हो ।
अमेरिका धेरै ठूलो देश भएकोले गैरकानुनी कामदारलाई तत्कालै अप्ठ्यारो पर्ने सम्भावना मैले देख्दिन । घरघरमै गएर गैरकानुनी कामदार खोज्ने सम्भावना हुँदैन । त्यहाँको कानुनले पनि त्यस्तो व्यवस्था गरेको छैन । करोडको संख्यामा गैर कानुनी इस्पेनीसहरू छन्, उनीहरु त्यहाँको अर्थतन्त्रका खम्बा नै हुन । त्यसैले गैर कानुनी कामदारलाई घर पठाउने सम्भावना नै छैन ।
डोनाल्डले धेरै मत पाएका राज्यमा त राज्यको उपस्थिति नै छैन । नेपालीहरू पूर्वि किनारा र पश्चिम किनारामा बढी छन् तर उनीहरुलाई घर पठाउने सम्भावना छैन । अर्को कुरो रह्यो, मेक्सीकोमा पर्खाल बनाउने । उक्त विषयमा रिपब्लिकनकै नेताहरूले डोनाल्डलाई साथ दिएका छैनन् । त्यसैले तत्कालै पर्खाल बन्दै बन्दैन ।
डोनाल्ड कुनै राम्रो उम्मेदवार भएर चुनाव जितेको होइनन् । हिलारी बाराक ओबामा जत्तिकै प्रखर नभएको र अमेरिकामा राजनीति प्रति असन्तुष्टि बढेकोले उनले चुनाव जितेका हुन् । हिलारी एक प्रकारले ‘टेस्टेड’ उम्मेदवार पनि थिइन ।
अमेरिकामा नेपालमै झैं राजनीति प्रति असन्तुष्टि रहेको छ । अहिले अमेरिकी जनतामा आम्दानी र रोजगारी घटेकोले असन्तुष्टि बढेको हो । गोरा अमेरिकनहरू राजनीति प्रति बढीनै निरास भएका हुन् । बाराक ओबामाले अमेरिकामा धेरै राम्रा काम गरेका छन् । त्यो भन्दा अघिल्लो पटकको रिपब्लिकन सरकारले डुबाएको अर्थतन्त्र अझै २० वर्ष सम्म लाइनमा आउन सक्दैन ।
ओबामाले व्यापार घाटा कम गरे । अर्थतन्त्र डामाडोल भएको थियो, उनले राज्यकोषबाट करोडौं रकम दिएर ठूला कम्पनीहरूलाई बचाएका थिए । रोजगारी केही बढेको छ तर उनले भनेका सबै काम गर्न नसकेको होलान । अर्को कुरा अमेरिकामा ८ वर्षमा जनमत बदलिइरहन्छ । कुनै दलले लामो समय शासन गरेको छैनन् ।
संयुक्त राष्टसंघमा नेपालका स्थायी प्रतिनिधि (राजदूत) भएर काम गरेका परराष्ट्रविद् डा. जयराज आचार्यसँग लोकान्तरका लागि विशाल भट्टराईले गरेको कुराकानीमा आधारित
