२३ असार २०८३, मंगलबार
अन्तर्राष्ट्रिय अनुसन्धाताहरूले हर्ड इम्युनिटीको रणनीतिलाई खारेज गरेका छन् ।
केही विशेषज्ञहरूले कम जोखिममा रहेका युवालाई भाइरसबाट संक्रमित हुन दिएर हर्ड इम्युनिटी बनाउनुपर्ने भनी यसअघि धारणा राखेका थिए ।
तर ८० जना अन्तर्राष्ट्रिय अनुसन्धाताहरूले कोभिड महामारीको सामना गर्न हर्ड इम्युनिटी खतरनाक अवधारणा भएको बताए । उनीहरूको पत्र मेडिकल जर्नल ल्यान्सेटमा प्रकाशित भएको छ ।
हर्ड इम्युनिटीका पक्षधरहरूले यसलाई रणनीतिका रूपमा अंगीकार गरेर लकडाउन लगायतका प्रतिबन्धलाई अन्त्य गर्नुपर्ने भनी वकालत गरेका थिए । हजारौं विशेषज्ञ, चिकित्सक र सर्वसाधारणको हस्ताक्षर त्यसमा परेको बताइएको थियो । तर त्यसमा अनेकौं मानिसको हस्ताक्षर कीर्ते रहेको पाइयो ।
ल्यान्सेटमा प्रकाशित नयाँ पत्रमा हर्ड इम्युनिटी सिद्धान्तको कुनै वैज्ञानिक आधार नरहेको भनी लेखिएको छ । यस पत्रमा हस्ताक्षर गर्नेहरू जनस्वास्थ्यविद्, भाइरस विज्ञान, सरुवा रोग र अन्य वैज्ञानिक क्षेत्रका मानिस छन् ।
उनीहरूका अनुसार, युवाहरूमा कोभिड–१९ फैलिन दिने हो भने समग्र जनसंख्या खतरामा पर्न सक्छ । अनि कोभिडले कसलाई बढी प्रभावित पार्छ र कुन वर्ग सबभन्दा कम प्रभावित हुन्छ भन्ने कुरा पनि अहिल्यै बताउन सकिँदैन ।
युवा र स्वस्थ मानिसमा कोभिडका दीर्घकालीन लक्षणहरू देखिएको पनि उनीहरूले उल्लेख गरे । अनि कोभिडबाट प्राकृतिक रूपमा संक्रमित भएका मानिसमा दीर्घकालीन स्थायी इम्युनिटी उत्पन्न हुने कुनै ठोस प्रमाण नपाइएको पनि उनीहरूको कथन छ ।
त्यसैले धेरै मानिसहरूलाई संक्रमित हुन दिँदा महामारी अन्त्य नहुने बरू उल्टो बारम्बार महामारीहरू उत्पन्न हुने र स्वास्थ्यकर्मी तथा अर्थव्यवस्थामा अनावश्यक बोझ पर्ने उनीहरूको भनाइ छ ।
