०४ साउन २०८३, सोमबार
ह्युमन राइट्स वाच नामक मानवअधिकारवादी संस्थाले निकालेको ताजा प्रतिवेदनले उत्तर कोरियाका कारागारमा मानिसमाथि जनावरलाई भन्दा खराब व्यवहार गरिने उल्लेख गरेको छ ।
यातना, बेइज्जती र जबर्जस्ती साबिती लिने काम हुने गरेका छन् ।
वाचले उत्तर कोरियाको कारागारमा बसेर छुटेका दर्जनौं बन्दीहरूसँग कुराकानी गरेर प्रतिवेदन तयार पारेको हो । त्यहाँ गरिने अमानवीय व्यवहार यातनाकै तहमा पुग्ने गरेको र त्यहाँको बसाइ नरकको जस्तो भएको प्रतिवेदनमा उल्लेख गरिएको छ ।
आणविक शक्तिसम्पन्न मुलुक उत्तर कोरिया बन्द मुलुक हो र त्यहाँको फौजदारी न्याय प्रणालीका बारेमा एकदमै कम सूचना मात्र उपलब्ध हुने गरेको छ ।
कैदीबन्दीहरूलाई लट्ठीले हिर्काउने र लात्ताले हान्ने गरिएको अन्तर्वार्ता लिइएका व्यक्तिहरूले बताए । विशेष गरी अनुसन्धानका लागि थुनामा राखिएका मानिसमाथि चरम दुर्व्यवहार हुने गरेको छ ।
‘
नियमअनुसार त कैदीहरूमाथि कुटपिट गर्नै मिल्दैन तर हामीलाई अनुसन्धानका क्रममा तथा प्राथमिक परीक्षणको शुरूआती चरणमा साबिती आवश्यक पर्छ,’ एक पूर्व प्रहरीले बताए ।
‘त्यसैले साबिती लिनका लागि उनीहरूलाई कुटपिट गर्नुपर्ने हुन्छ ।’
पूर्व बन्दीहरूले बताएअनुसार, उनीहरूलाई भुइँमा स्थिर भएर बस्न, घुँडा मारेर वा टेकेर दिनको १६ घन्टासम्म बाध्य बनाइएको थियो । अलिकति पनि हलचल गर्दा सजाय पाइन्थ्यो ।
बन्दीहरूलाई हातले, लट्ठीले वा छालाको पेटीले हिर्काइने अनि आँगनमा एक हजारपटक घुमीघुमी दौडिन लगाउने सजाय दिने गरिएको छ ।
यो प्रतिवेदनमा उत्तर कोरियाबाट भागेका आठजना पूर्व अधिकारी तथा १५ महिला र ७ पुरुष गरी २२ पूर्व बन्दीहरूसँगको अन्तर्वार्ताबाट आएका निष्कर्षहरू समावेश गरिएको छ ।
