०६ असार २०८३, शनिबार
अमेरिकामा क्रिस्चियन धर्मप्रचारक प्याट रोबर्टसनले नोभेम्बर महिनामा हुन लागेको राष्ट्रपति निर्वाचनमा डोनल्ड ट्रम्प पुनः विजयी हुने भविष्यवाणी गरेका छन् ।
ट्रम्पले जितेपछि विश्वको अन्त्य हुने समेत उनले बताए ।
सन् २०१६ को चुनावमा पनि ट्रम्पले गरेको स्त्रीद्वेषी टिप्पणीपछि रोबर्टसनले उनको समर्थन गरेका थिए । रोबर्टसनलाई धार्मिक दक्षिणपन्थी र रिपब्लिकन पार्टीलाई समर्थन गर्ने अनुदारवादीहरूले व्यापक रूपमा समर्थन गर्ने गरेका छन् ।
क्रिस्चियन ब्रोडकास्टिङ नेटवर्कका संस्थापक तथा प्रस्तोता रोबर्टसनले मंगलवार ट्रम्पको पुनः विजयको घोषणा गरेका हुन् ।
आफूलाई ईश्वरबाट सीधा सन्देश आएको यी ९० वर्षीय धर्मप्रचारकले बताए ।
‘ईश्वरले मलाई भनेको कुरामा विश्वास गर्ने हो भने राष्ट्रपति पुनर्निर्वाचित हुनेछन्,’ उनले ठोकुवा गरे ।
निर्वाचन परिणाम आएपछि अशान्ति आउने अनि इजरायलविरुद्ध युद्ध हुनेछ, उनले भने ।
द्वन्द्वपछि शान्तिकाल आउने र शायद अन्त्य आउने उनले दाबी गरे ।
रोबर्टसनको भनाइ ट्विटरमा तत्कालै भाइरल भयो । केही प्रयोगकर्ताहरूले रोबर्टसनका पुराना भविष्यवाणी नमिलेको बताए ।
सन् १९७६ मा पनि रोबर्टसनले विश्वको अन्त्य सन् १९८२ मा हुने बताएका थिए । अनि सन् १९९० मा उनले पुस्तक लेखेर सन् २००७ को अप्रिल २९ मा विश्व तहसनहस हुने लेखेका थिए । तर केही पनि भएन ।
