प्रधानमन्त्री केपी शर्मा ओलीसँग भारतीय गुप्तचर संस्था रिसर्च एण्ड एनालाइसिस विङ (रअ) का प्रमुख सामन्तकुमार गोयलले बुधवार शिष्टाचार भेट गरेको बालुवाटारले पुष्टि गरेको छ । 

बुधबार बेलुका प्रधानमन्त्रीको सरकारी निवास बालुवाटारमा भेटवार्ता भएको प्रधानमन्त्रीका प्रेस सल्लाहकार सूर्य थापाले बिहीवार दिउँसो एक विज्ञप्तिमार्फत जानकारी गराएका छन् ।

‘भेटका क्रममा उहाँले नेपाल–भारतबीचको मैत्री सम्बन्ध खल्बलिन नदिने, समस्याहरूको वार्ताद्वारा समाधान गर्ने र पारस्परिक सहयोगलाई निरन्तर अगाडि बढाउने विषयमा आफ्नो धारणा राख्नु भयो,’ थापाले बिहीवार प्रेस नोट जारी गर्दै भनेका छन् । 

भारतले अतिक्रमण गरेको नेपाली भूमि समेटेर नेपालले नयाँ नक्सा प्रकाशित गरेपछि दुई देशबीचको सम्बन्धमा चिसोपना आएको थियो । रअ प्रमुख गोयलले समस्याहरूको वार्ताद्वारा समाधान गर्ने भनेर कालापानी क्षेत्रको विवाद समाधानका लागि भारत लचिलो बन्ने संकेत देखाएका छन् । 

यसअघि नेपालले वार्ताका लागि पहल गर्दा भारतले समय दिएको थिएन । भारतीय गुप्तचर संस्थाका प्रमुखसँगको भेटवार्ताबारे सरकारले विज्ञप्तिमार्फत जानकारी गराउने दुर्लभ घटना हो ।

बुधवार नेपाल आएका भारतीय गुप्तचर संस्था ‘रअ’का प्रमुख सामन्त गोयल बिहीवार स्वदेश फर्किएका छन् । 

भारतीय सेनाको विशेष विमानमार्फत् काठमाडौं आएका रअ प्रमुखले काठमाडौंमा अन्य राजनीतिक भेटवार्ता पनि गरेका थिए । 

नेकपाका अध्यक्ष पुष्पकमल दाहाल ‘प्रचण्ड’ र वरिष्ठ नेता माधव नेपालले भने रअ प्रमुखसँग भेटवार्ता नभएको बताएका छन् ।