यो पटकको दशैं कसरी मनाउँदै हुनुहुन्छ ?

पहिलेको दशैंभन्दा अलिकति फरक हुन्छ । पक्कै पनि कोभिड–१९ ले गर्दा यसपटक हामीले खुलेर दशैं मनाउन पाउने छैनौं । घरबाट कतै नजाने निर्णय गरेका छौं । आफन्तहरूलाई पनि यसपटक टीका लगाउन नआउनुस् भनेका छौं । वास्तवमा यो पटकको दशैं सुनसान हुने भयो ।

योपटक दशैंमा मिस भएको कुरा के हो ?

आफन्तसँगको भेटघाट, रमझम ।

जिन्दगीमा बिर्सिन नसकेको दशैं सम्झना ?

बुवा खस्नुभएको वर्ष । त्यो वर्ष असाध्यै नराम्रो लागेको थियो । सधैँ टिका लगाएर आशीर्वाद दिने मान्छेलाई अबदेखि कहिल्यै देख्न पाउने छैनौं भनेर असाध्यै यादले सतायो । आज पहिलोपटक भन्दैछु, मलाई त्यसपछिका हरेक दशैं शून्य लाग्न थालेको छ ।

दशैंको सबैभन्दा महत्त्वपूर्ण पक्ष के हो ?

सबै कामबाट अलिकति भएपनि ब्रेक मिल्छ र परिवारसँग केही समय बिताउने मौका पाइन्छ ।

दशैंमा सपिङ गर्ने बानी कत्तिको छ ?

दशैंमा बच्चा बेला जस्तो उत्साह हुँदैन । त्यसपछि आवश्यक पर्दा सपिङ गर्ने, आवश्यक परेन भने नगर्ने हुन थाल्यो ।

दशैंको राम्रो–नराम्रो पक्ष के–के हो ?

दशैंको नराम्रो पक्ष छैन । यसका सबै राम्रा पक्ष छन् । शायद त्यही भएकाले यसलाई बडा दशैं भनिएको हुन सक्छ । दशैंका बेलामा मानिसहरू धेरै फ्री हुने र त्यो समयमा खानपान, जुवातास, रमाइलो गर्ने चलन छ । रमाइलो गर्दैगर्दा अलिकति ध्यान दिए हुन्थ्यो भन्ने मात्रै मेरो कुरा हो ।

दशैं मनाउने तरिका परिवर्तन हुँदै गएको जस्तो लाग्छ ?

दशैं मनाउने तरिका परिवर्तन भएको त होइन तर, आधुनिकताले पहिलाभन्दा यसको महत्त्व कम हुँदै गएको जस्तो मैले अनुभव गरेकी छु । तर, मेरो र मेरो परिवारका लागि दशैं सधैँ उस्तै रमाइलो पर्व हो ।

दशैंका बेला खानपानमा खासै ध्यान दिएको पाइँदैन नि ?

चिल्लो पिरोबाट जोगिनुपर्छ । अर्को कुरा जे खाँदा पनि लिमिटमा रहेर सेवन गर्न सकियो भने स्वस्थ हुन सकिन्छ ।

सानो छँदाको दशैं सम्झना कत्तिको याद गर्नुभएको छ ?

काठमाडौं बस्ने भएकाले दशैंमा गाडी चढेर बुवाको घर, मामाघर गइन्थ्यो, त्यो नै खुशी लाग्ने यादहरू हुन् ।

दशैँका बेला सधैँ सम्झनामा आउने एउटा याद के हो ?

मलाई गाउँमा गएर दशैंको टीका लगाएको असाध्यै मन पर्छ । गाउँको पन, गाउँको माया, गाउँबाट पाइने आत्मीय व्यवहारलगायत धेरै कुरा मन पर्छ ।

शायद, शहर हो परिवर्तन हुँदै गयो । गाउँ कहिल्यै आफ्नो कुरूप अनुहार देखाउन सकेन ।