२९ असार २०८३, सोमबार
अमेरिकाको स्पिरिट एयरलाइन्सको विमानमा एक महिला गत जुलाई महिनामा कोरोनाभाइरसका कारण मरेको तर अन्य यात्रुहरूलाई उनको मृत्युको कारण नखोलिएको अहिले आएर पत्ता लागेको छ ।
ती ३८ वर्षीया महिलालाई दमको रोग थियो । उनी लास भेगासबाट डाल्लासतिर जाँदै गर्दा विमानमा सास फेर्न गाह्रो परेको थियो ।
उनी कोरोनाभाइरस पोजिटिभ रहेको कुरा अन्य यात्रुहरूलाई बताइएन ।
उडान नम्बर २०८ मककरान अन्तर्राष्ट्रिय विमानस्थलबाट बेलुका ७ः२२ मा उडेको थियो ।
विमान उडेको केही बेरमै उनलाई सास लिन गाह्रो परेको थियो । उनीसँग त्यतिखेर इन्हेलर वा अक्सिजन सप्लिमेन्ट समेत थिएन ।
विमानकी एक कर्मचारीले ती यात्रुलाई मुख जोडेर श्वास दिने सीपीआर दिएकी थिइन् तर लामो समयसम्म सीपीआर दिँदा उनी आफैं बेहोश भइन् ।
त्यसपछि विमानलाई न्यु मेक्सिकोको याल्बकर्कीतिर लगिएको थियो । त्यहाँको विमानस्थलमा स्वास्थ्यकर्मीहरू उपस्थित थिए ।
उनलाई बचाउनका लागि कैयौं मिनेटसम्म कोशिश गरिएको थियो तर पछि घटनास्थलमै उनको मृत्युको घोषणा गरियो ।
अनुसन्धानकर्मीहरूले घटनाको दुई दिनपछि उनलाई मृत्युको समयमा कोरोनाभाइरस रहेको थाहा पाए तर कुनै पनि यात्रुलाई यसको जानकारी दिइएन ।
डाल्लास काउन्टीले अक्टोबर १८ मा कोरोना मृत्युको संख्या सार्वजनिक गर्दा बल्ल ती महिलाको मृत्यु कुन परिस्थितिमा भएको भन्ने खुलासा भयो ।
