१० साउन २०८३, आइतबार
सत्तारूढ दल नेपाल कम्युनिस्ट पार्टी (नेकपा) भित्र आन्तरिक संघर्ष चुलिएको बेला अध्यक्ष पुष्पकमल दाहाल ‘प्रचण्ड’, वरिष्ठ नेता माधवकुमार नेपाल र प्रवक्ता नारायणकाजी श्रेष्ठले बिहीबार पार्टी कार्यालय पेरिसडाँडामा वकिलहरूसँग परामर्श गरे।
नेताहरूले पेरिसडाँडामा नेपाल बार एसोसियसनका अध्यक्ष चण्डेश्वर श्रेष्ठ लगायतका केही कानून व्यवसायीहरूसँग परामर्श गरेका हुन् ।
प्रधानमन्त्रीनिकट नेताहरूले पार्टीभित्र अन्तरसंघर्ष बढेका बेला एउटा पक्षले कानून व्यवसायीहरूसँग छलफल र अन्तरक्रिया गर्नु सन्देहास्पद रहेको टिप्पणी गरेका छन् ।
‘यतिबेला कानून व्यवसायीहरूसँग छलफल गर्नुको अर्थ के हुन सक्छ, आफैं कुरा बुझ्नुस् न,’ बालुवाटारनिकट एक नेताले लोकान्तरसँग भने । उनको आशय पार्टीभित्र बढिरहेको अन्तरसंघर्ष र अब चाल्न सकिने कानूनी बाटोका बारेमा प्रचण्ड–नेपाल समूहले वकिलहरूसँग छलफल गरेको रहेको थियो ।
तर छलफलमा पार्टीभित्रको अन्तरसंघर्षका बारेमा कुनै कुरा नभएको प्रवक्ता श्रेष्ठले लोकान्तरलाई बताए । ‘पार्टीको अन्तरसंघर्षका बारेमा कुनै कुरा भएको छैन,’ प्रवक्ता श्रेष्ठले भने, ‘बार एसोसियसनको काम, न्यायपालिकासम्बन्धी विषय र न्यायपरिषद्को भूमिकाका विषयमा छलफल भएको हो ।’
