०९ साउन २०८३, शनिबार
अमेरिकाले ताइवानलाई बेचेको एफ–१६ लडाकू विमान तालिमका क्रममा दुर्घटनाग्रस्त भएपछि ताइवानले सबै १४० वटा विमानलाई मंगलवार बेलुका उडान रद्द गरेको छ ।
एक सीट भएको एफ–१६ विमान हुआलिएन हवाई अड्डाबाट उडेको दुई मिनेट पनि नबित्दै प्रशान्त महासागरमाथि राडार स्क्रीनबाट गायब भएको थियो ।
विमानका चालक कर्नेल चियाङ चेङ–चिहको खोजी जारी रहेको ताइवानको राष्ट्रपति कार्यालयले जनाएको छ ।
राष्ट्रपति त्साई इङ–वेनले बुधवार बिहान पत्रकारहरूलाई बताएअनुसार, दुर्घटनाको अनुसन्धान जारी रहुन्जेल सबै एफ–१६ विमानहरूको उडान रद्द गरिएको छ ।
ताइवानको लडाकू विमानको जत्थामा आधा जति एफ–१६ विमानहरू छन् । चीनको जनमुक्ति सेनाको वायुसेनाका युद्धविमानहरू लगातार ताइवानको हवाईक्षेत्रमा प्रवेश गरेपछि ताइवानका लडाकू विमानलाई भ्याइनभ्याइ भएको छ ।
चीनले ताइवानमा पूर्ण सार्वभौमसत्ताको दाबी गर्ने गरेको छ यद्यपि सन् १९४९ मा सकिएको गृहयुद्धपछि दुवै स्थानमा बेग्लाबेग्लै सरकारले शासन चलाइरहेका छन् । चिनियाँ अतिक्रमण रोक्नका लागि ताइवानले लगभग ९०
करोड डलर बराबरको खर्च गरिसकेको ताइवानका रक्षामन्त्रीले अघिल्लो महिना बताएका थिए ।
अहिले लडाकू विमानहरूको उडान रद्द गरेको भए पनि ताइवानी बलहरू टापुको रक्षा गर्न तम्तयार रहेको बताए ।
‘राष्ट्रिय सुरक्षा कायम गर्नका लागि रक्षा तथा लडाइँको तयारी सुस्त बनाउनुहुँदैन,’ उनले भनिन् ।
