१० साउन २०८३, आइतबार
उपप्रधानमन्त्री तथा नेकपाका सचिवालय सदस्य ईश्वर पोखरेलले बुधबारको सचिवालय बैठकमा प्रधानमन्त्री तथा पार्टी अध्यक्ष केपी शर्मा ओलीले आफू माथि लगाइएको आरोप अस्वीकार गर्ने उद्घोष गरेको बताएका छन् ।
‘आफूमाथि लगाइएका “ तथ्यहीन , आधारहीन, पार्टी एकतामा गम्भीर रूपमा आँच पुर्याउने मनसाय र उद्देश्यबाट प्रेरित आरोपहरू” लाई आफूले अस्वीकार गर्ने र खारेज गर्ने उद्घोष गर्नुभएको छ केपी शर्मा ओलीले सचिवालयको बैठकमा’, पोखरेलले सामाजिक सञ्जालमार्फत भनेका छन्, ‘त्यसको व्यवस्थित र सामग्रिक रूपमा खण्डन गर्ने कुराको समेत घोषणा गर्नुभएको छ , उहाँले ।’
उनले कार्यकारी अध्यक्ष प्रचण्डले आफ्नो प्रस्तावमार्फत लगाएको आरोपहरूको छिनोफानो नगरी पार्टी एकताको प्रकृयालाई अगाडि बढाउन सहज र सम्भव नहुने कुराको समेत ओलीले उल्लेख गरेको बताएका छन् ।
‘यो गम्भीरतालाई पार्टी एकताको पक्षमा उभिनु भएका नेकपाका सबै तहका नेता , कार्यकर्ताहरूले बुझौं र त्यसै अनुसार आफूलाई तयार बनाऔं ’, पोखरेलले भनेका छन् ।
